W.Q: Axmed Ismaaciil
Maxamuud (Axmed Deeq)
Weli adiga iyo
naftaadu habeenno ma kala dhaxdeen, Maalmana ma kala maqnaydeen? Ma isku soo
hilowdeen, habna ma isa siiseen? Hadda waa adiga iyo naftaada !!
Siddeed iyo toban caano maal baan aniga iyo naftaydu is mooganayn. Halgan iyo heegan bay ku jirtay, anna hurdo iyo hadal baan ku jiray. Dhiiri galin iyo dhiig dhaqaajin bay ku jirtay, anna dhalandhool iyo dhabannnohays baan ku jiray. Fagaaraha Taxriir (Maydaan Taxriir, Masar) ayay inta samaha iyo sinaanta jecel jaal kula ahayd, anna xaafadda Madiinatu Nasri ayaan inta xuska dabada kula jirta ee xaalkoodu ahaa beerka jecli xaydha jecli saaxiib kula ahaa.
Dhallintii
dhulkaygaay,
Dhaawac baan
qabaayoo,
Wadnahaygu dhiigaba,
Ma dhaqaajinaayee,
Dhankaad iga xigtaan
baa,
Dhaxantu iga haysaa,
Dhankaad iga xigtaan
baa,
Layga soo dhacayaa,
Dhankaad iga xigtaan
baa,
Dhurwaagu iga
cunayaa,
"Axmed Deeq"
Siddeed iyo toban
caano maal baan aniga iyo naftaydu is mooganayn. Halgan iyo heegan bay ku
jirtay, anna hurdo iyo hadal baan ku jiray. Dhiiri galin iyo dhiig dhaqaajin
bay ku jirtay, anna dhalandhool iyo dhabannnohays baan ku jiray. Fagaaraha
Taxriir (Maydaan Taxriir, Masar) ayay inta samaha iyo sinaanta jecel jaal kula
ahayd, anna xaafadda Madiinatu Nasri ayaan inta xuska dabada kula jirta ee
xaalkoodu ahaa beerka jecli xaydha jecli saaxiib kula ahaa.
Geesiyada geedka
gobanimadu dhiigoodu ku baxdo ayay wayrixin iyo waano iskugu dhafaysay, anna
giirrayaasha (fulayaasha) haweenka iyo carruurta ku dhex dhuumanaya ayaan
baqasho la dhex joogay. Ul dheer baan guriga dhexdiisa kula wareegayay, anniga
oo hablaha geesinimo aan meel fog jirin u muujinaya. Gabdhuhu marka ay isha ku dhuftaan budka garma
qaataha ah ee midigtayda ku jira iyo sida aan naqaska iskugu xidhayo waxa ay is
lahaayeen: Kani boqol nin oo warmo
haysta biyaha u kaban maayo. Hadda bisadi haddii ay albaabka dhaqaajiso is
dhiib baan ku jiray oo wadnahaan farta ku hayay. Fule, illaahay wuxuu asturay
markuu haween iyo carruur u abuuray . Laakiin anniga waa ii cudur, waayo
naftaydii baa iga maqnayd.
Halgankii markii uu
dhammaaday. Heeryadii gumaystaha markii ay Masar hagaag isaga tuurtay. Waxay
hibanaysay markii ay si toos u sheegatay ayaan naftaydii ka codsaday inay soo
guryo noqoto. Waase igu gacan saydhay! Waxa ay iga dalbatay inaan fagaaraha
xoriyadda ugu tago oo aannu halkaa iska soo raacno. Barqo Axadeed ayuun bay
ahayd markii aan dheereeyaha dhinaca kaga booday, anniga oo u sii jeeda dhankii
fagaaraha xoriyadda. Axaddaas iyo Sabti ka horraysay ayuun bay Masar iyo
odaygii qabay is mooganaayeen . Wuu jeclaa haysashada islaanta, laakiin qasab
baa lagaga furay. Haddii ay cid kale ka dhaqqjisan ciilba ma qabeene, waxa ka
furay ubadkiisii. In ay sidaa yeelaan
gar bay u lahaayeen, wayna ku sax
sanaayeen. Sababtoo ah odaygu wuxuu
curdan dhadhiyay ubixii u soo kacayay. Wuxuu rajo tiray dhallintii dhulkooda
jeclayd. Wuxuu isku soofeeyay muslimkii iyo gaalkii waddanka wada lahaa.
Iyaba waa yaabe,
islaantii soddonka gu' siifadda siddeetan jirku ku baxaysay ee aan is lahaa
meel la taabto ma leh, maalin qudha ayay ku xuub dhacsatay. Dun wanaagsanaydaa,
waxaad mooddaa labaatan jir hilib iyo hannaan dumarnimo loo dhammeeyay. Dheeha
dhabankeeda ku yaalla ayaa laba daraadle qalbigaaga bar jacayl ku dhigaya;
hunguri aan hore ku hayn baa ku galaaya. Haddii aanan ka cabsi qabin in ay
hadhaw I tidhaa: Mubaarak sidaa ima odhan jirin iyo halkaa lagagama tago, ama
aan carruurteedu qasab hooyaday noogu fur i odhanayn waaban iska guursan lahaa.
Adduunyadu in ay
filim tahay duqii qabay geeri buu qarka u saran yahay; murugo iyo muusanaw buu
dabinta la ruugayaa; Ciil iyo caloolyow buu habeen walba la caweeyaa, iyaduna
guur iyo geyaan bay isku diyaarinaysaa. Mashxarad iyo maaweelo ayay ku jirtaa.
Cawo iyo caleemo lulid bay ku cawaynaysaa. Cidadda ay dumarku tirsadaan haddii
ay afar bilood ahaan jirtay iyada laba ayaa loogu kordhiyay oo lix baa looga
dhigay. Innagu celi aroortii Axadeed. Baabuurku wuxuu sii haw leeyaba waxaanu
gaadhnay goobtii maalmahaa magacu saarnaa (Maydaan Taxriir) meel u dhaw. Kol
alla kolka aad goobta u soo dhawaato waxa ku saaqaya xamaasadda iyo xiinka
dadwaynaha. Waxaad dareemaysay in meesha samo iyo sinnaan lagu hayay. Barako
iyo beerraq baa boggaaga iyo beerkaaga ku abuurmaya. Aad yar baan ka degay
dheereeyihii. Wixii uu waduhu sheegtay oo aan wax yar ka jarayna waan siiyay.
Dabadeedna cidhib barako leh ayuu ku dhuftay.
Jidadka dhawrka ah ee
Maydaan Taxriir ku hormada waxaan ka soo galay jidka Cabdul Muncim Riyaad (waxa
uu ahaa halgamaa Masriya Alle ha u naxariistee). Waxaan soo daba marteeyay
Madxafka midabka guduudan leh ee uu Fircoon ka taliyo laguna booqdo. Intaa
waxaan dhex jibaaxayay mawjado dad ah oo wada muraaqoonaya. Abbaartaydu meeshii
ay ahayd markii aan soo gaadhay waxa gacmo furan igu qaabishay naftaydii. Hilow
iyo kalgacal aannu isku qabnay darteed haddii aanu isku dhegnay, dhabanadana
iska dhunkanay, waxaan la yaabay isbedelka ku dhacay. Waa maxay waxan oo
widhwidh ahi? Waa maxay waxan oo dhoola cadayn ahi? Waa maxay waxan oo
firfircooni ahi? Waa maxay waxan oo muusood ahi? Anniga oo yaabban ayay igu
tidhi: Isbedelka iga muuqda waxa u sabab ah waddaniyadda aan ka hirqaday ee
dhiigayga iyo dhuuxayga sidaa u dhex qul ulaysa. Waxa u sabab ah waddaniyadda
qanjaha I taagan.
Haddii aan anniga iyo
naftaydii isku noqonay annaga oo is jecel, waxaan u holladay inaan hoomaamiyo
hareerahayga. Mawjado dad ah oo meel ay ka soo kacayaan aanan garanayn baan
dhex muquurtay. Way I qaadaa dhigeen oo qalbigayga ayay luleen. Markaan hafan
gaadhey dabaala joogtayn baan u beddelay. Foolasha dadka waxa ku taagnaa dhibco
biyo ah oo aanan ka war hayn goorta ay tiixayaan. Cadceedu waa walacsanaysay oo
marna daruur bay galaysay, marna dibadda ayay u soo baxaysay. Daruuruhu socod
gaardis ah ayay ku jireen oo waxay u kala dab qaadayeen daafaha dalka. Gaashaan
qaadka iyo guudlaydu waxay ku foognaayeen qurxinta iyo qaabaynta jidadka.
Gurboodka iyo gabannada waxa lagu anqarinayay dal jacayliyo is xilqaan. Gadh
caddaaga iyo ganboolaydu ducada iyo dardaaranka ma kala goynayn. Heesaha
waddaniga ah ee codadka hallaasiga ah lagu ladhay baa dadka qaadaa dhigayay oo
hilmaansiinayay meel ay joogaanba. Qofka aad jiidhaa isaga ayaa dib kuu raalli
galinayay. Laba is danqaraya iyo laba is daandaansanaya midna indhahaagu ma
qabanayn. Laba is hiifaya iyo laba is haaraamaya midna dhegahaagu ma maqlayn.
Waa la is laab xaadhanayay oo luflufkii iyo leeleelkii uu nidaamkii jiray baday
baa la iska dhaqayay. Cawadooda iyo ayaankooda ayay la ciyaaray. Himiladii
dadkan oo hagaagtay baad arkaysay. Riyadoodii oo rumawday baad halacsanaysay.
Biqilkii yididiilada oo isla jeerkaas ubax caynba cayna bixiyay baad ku indho
doogsanaysay.
Goortaan is idhi waad
ka hirqatay nimco iyo naruuro wixii meesha yaallay ayaan baal uga baxay
dadwaynihii. Haddii aan salka dhulka la helay oo aan is idhi bal kala habayso
wixii maanta kaaga soo go'ay meeshan, mise waxaba igu dhacay maskax burur.
Afkaartii baa iska kay dhex gashay oo aan kala guri kari waayay. Waydiimo aan
tiro iyo cadad lahayn oo aanan garanayn cidda I waydiinaysa ayaa la igu
harqiyay. Waxa ka mid ahaa, suurto gal ma tahay inta aad nooshahay inaad aragto
Soomaali oo xaaladdan oo kale ku jirta? Soomaali oo ku faanaysa magaceeda
Soomaalinimo? Soomaali oo silica iyo saxariirka ay is badday ku bedelanaysa
sharaf iyo shacni? Soomaali oo qoqobka iyo qabiilka ku bedelanaysa sinnaan iyo
samo? Soomaali oo meel ay joogtaba is jecel oo jaal ah? Soomaali oo
dhallinteedu ku celcelinayso "Dhallintii wadankiyo, Dhulkaanu nahoo, Inaan
dhimaniyo, inaan dhisanno, maantaan waxba nooga dhaxayn". Allaha nafta I
galiyay ee Soomaali iga dhigay baan ku dhaartay. Allaha wayn ee waaxidka ah
baan ku dhaartay. Allaha aan baahan ee loo baahan yahay baan ku dhaartay. Allaha
wax bog jira iyo wax baabaco jira og baan ku dhaartay. Allaha aanu arrinkiisu
surma seegtada lahayn baan ku dhaartay. Allaha uurkayga iyo afkayga og baan ku
dhaartay. Waa suurto gal intaa iyo in ka badaniba. Waxayse ku xidhan tahay
dedaalka iyo daacadnimada barbaarta Soomaaliyeed ee aan ka midka ahay. Waxay ku
xidhan tahay foojignaanta iyo fiira dheeraanta aqoonyahanka Soomaaliyeed. Waxay
ku xidhan tahay baraarujinta iyo bislaynta bulshada Soomaaliyeed. Waxay ku
xidhan tahay bahaha qalinka iyo fanka oo bulshada hanuuninteeda iyo
hagaajinteeda hadh iyo habeen heegan u ahaada. Waxay ku xidhan tahay dhalinta
oo hurdada dheer ka toosta oo dhan u wada jeedsada.
Dhallinyahay
walaaciyo,
walbahaarku
daashaday.
Dhallinyahay wax
garadiyo,
Waayeelkoodu
dayrsheen,
Dhallinyahay waqtigu
gabay,
Marka aan ku
weehdaba,
Wahan bay dilaayoo,
Wadnahayga rudhayee,
Waaxyahaygii
midigoow,
Kuwaan
weheshanaayiyo,
Wadayaasha dhiigoow,
Wareegtada
adduunyada,
Wadartii is raacdaa,
Weel biyayn karaysee,
Wacad ma ila
maraysaan,
Inta waaxyaheenniyo,
Waddankeenu sidan
yahay,
Wahsi inaan is
daynoo,
Walbahaarka
dhaafnoon,
Dhisno wada
jirkeennoo,
Weheshiga adkaynnoo.
"Axmed Deeq"
Dhallintii dhulkaygaay, xumaan iyo xasad baa
la inagu abuuray, naxli iyo nuxus baa dhexdeenna la dhigay. Waa la innoo kala
sheekeeyay, waana la ina kala qoqobay. Dabadeed cududdeenii baa wiiqantay;
caqligeennii baa kala dhantaalmay; aayaheennii baa aydu cuntay. Iskuma uur
fayoobin, iskumana caloolsamin. Kaalintii aan bulshada ku lahayn baan gabnay.
Qanac iyo quus baa quluubteenna ku samaysmay. Qayrkeen baan ka hadhnay. Inteena
kulantaa reernimo ayay isku aragtaa, inteenna kala tagtaana reernimo ayay ku
kala tagtaa. Cabasho iyo caloolyaw baa innaga soo hadhay. Xooggeenii baa daah
la inaga saaray.
Dhallintii
dhulkaygaay ma joogno xilligii la werweri lahaa. Waxaanse maraynaa xilligii loo
calaacalay ee uu gabyaagii Carbeed yidhi: " Hooggaygee, dhallinyarnimo
miyay maalin ii soo noqoto, aan uga warramo cirro waxay I badaye". Walaalayaal
aan is weheshanno, aan wada jirno, intii meel wada joogtaaba wax isku
ahaanshaheeda iyo walaaltinimadeeda ha ka taliso, ha isku timaad, wax ha wada
qabsato.
Dhalintii
dhulkaygaay, dhawaqaygu wuxuu daaran yahay dhulkeennii, dhirteennii iyo dhagaxeennii
baa innoo dhawaaqaya ee aan u jawaabno, oo aan nidhaahno:
Haddii aanan dhiman,
Dhulka hoos marin,
Dhibtaad mudatiyo,
Dhaawacaagaba,
Waannu dhayiyoo,
Dhakhsaad uga kici,
Ee beryo na dhawr.
"Axmed Deeq"
Axmed Ismaaciil
Maxamuud (Axmed Deeq)
E-Mail:
awliyo177@hotmail.com
Alla Mahad leh.
No comments:
Post a Comment