" B.M.KAARIYE - Hoyga Qoraallada iyo Falanqaynta Toolmoon: Baro waxbarasho Jaamacadeed oo bilaash ah adigoo gurigaaga ama xafiiskaaga jooga!

Tuesday, February 19, 2013

Baro waxbarasho Jaamacadeed oo bilaash ah adigoo gurigaaga ama xafiiskaaga jooga!

Hargeysa – Jaamacadda barashada cilmiga iyo deraasaadka Islaamka (Islamic Online University) oo faraceeda gobollada soomaalida ka furtay magaalada Hargeysa ee Somaliland, si fursad ay ugu helaan ardayda ku nool gobollada wadanka ee doonaysa in ay wax ka bartaan Jaamacadan, ayaa soo kordhisay waxbarashado shahaadada sare (Master) oo barashada iyo dersidda Islaamka ah.
 Jaamacaddan oo hore looga bartay in ay bixiso waxbarasho la xidhiidha barashada Islaamka oo shahaadada koowaad ah (Bachelor Degree), isla markaana ay dufcaddii u horraysay ay xilli-waxbarasheedkii hore u fadhiisteen imtixaankii, kuwaas ka mid ahaayeen arday kala jooga degellada soomaalida, sida Hargeysa, Garoowe, Muqdisho iyo meelo kale, ayaa bishan March 2013 ay bilaabmayso duruustii cutubka labaad (Second semester).

 Dhinaca kale, ardayda ay ka buuxsantay sanadkii hore inay is-diiwaangeliyaan ayay fursad u tahay inay mar kale is-diiwaangeliyaan, si ay u helaan duruus hufan oo la xidhiidha diinta iyo maaddiga labadaba. Sababtoo ah, ardayda soomaalida ah ee Somaliland iyo Soomaaliya ka soo codsaday sanadkii hore  ee is-diiwaangeliyay ayaa lagu sheegay inay noqdeen kuwo kaalmo sare ka galay liiska dalalka codsaday. “Somaliland/Somalia ardayda ka soo jeeda ee waxbarashada bilaabay oo tiro badan awgeed, waxay ka dhigayaan dalalkaas inay kaalinta 12aad ka galaan liiska waddamada caalamka ee ardaydoodu jaamacaddan dhigtaan,” ayaa lagu yidhi warbixin kooban oo ay jaamacaddu ku baahisay baraha ay ku leedahay baraha bulshada ee Internet-ka, sida Facebook.
 Jaamacaddan oo faraceeda Somaliland ay ogolaanshaha shaqada ka haysato wasaaradda waxbarashada iyo tacliinta sare ee Somaliland, ayaa soo kordhisay shahaadooyin kala duwan oo kala ah; shahaadada sare (Master) iyo shahaadada Higher Diploma oo u fududaynaysa ardayda aan hore u haysan shahaadada koowaad ee barashada Islaamka, balse haysta shahaadada koowaad ee nooc kasta oo kale oo ka mid ah waxbarashada la dhigto, inay bartaan qaataan shahaadada sare ee barashada iyo deraasaynta Islaamka (Master for Islamic studies - http://bais.islamiconlineuniversity.com/maisb/). Iyada oo sanadka 2014 ay jaamacaddu bilaaabi doonto shahaadada u sarraysa ee PhD.
 
Waxa kale oo ay jaamacaddu bilowday barnaamij la yidhaahdo ILA TALI (Islamic Councelling service). Waxaana bixin doonta gabadh ku takhasustay barashada dabeecadaha.
 Dhammaan duruustu waxay ku baxayaan habka loo yaqaano masaafada (Distance learning).
 
Hoos ka akhri su’aalo aad isweydiin lahayd iyo jawaabahoodii.
-Waxbarashada Jaamacadda IOU ma bilaash baa?
Jaamacaddani waxay bixisaa laba shahaado oo kala ah; Diploma iyo Degree la xidhiidha daraasaadka Islaamiga ah (Bachelor of Arts in Islamic Studies –BAIS- degree). Shahaadada Diploma guud ahaanba waa bilaash, halka shahaadada Degree lagaa qaadayo lacag sar-go’an oo ah kharashka isdiiwaangelinta simistar kasta, taas oo u dhaxaysa 40 Dollar ilaa 120 Dollar Semesterkiiba. Waxaana qaddarka lacagta lagaa qaadayaa ay ku xidhan tahay dalka aad dunida ka joogto. Qof kasta oo ku nool Somaliland iyo Soomaaliya waxa laga doonayaa afartan dollar ($40) oo ah feega diwaangelinta. Halka dadka doonaya inay bartaan shahaadada sare (Masters) iyo Higher Diploma laga qaadayo ($80) oo kaliya xilli-waxbarasheedkii kastaba (Per semester).
 
-Waa maxay faa’iidada ku jirta in wax laga barto IOU?
 
Jaamacadda IOU waxay bixisaa duruus la xidhiidha barashada rasmiga ah ee Islaamka oo salka ku haya Quraanka iyo Sunnaha. Waxa kale oo duruusta ay jaamacaddani bixiso ka mid ah xiisado casri ah, sida; barashada dhaqaalaha Islaamka, barashada hab-dhaqannada iyo hab-shaqada maskaxaha bani’aadamka (Psychology), maamulka iyo maaraynta, I.W.M.
 Waxaana dhammaantooda laga eegayaa dhinaca aragtida uu Islaamku ka qabo, si ardayda faham ballaadhan looga siiyo, uguna shaqeeyaan xirfaddooda si waafaqsan anshaxa iyo qiyamka Islaamiga ah.
 
-Halkee ayay ku taallaa Jaamacadda IOU?
 Jaamacadda IOU waajaamacad lagu barto hab fudud adiga oo jooga meel kasta oo dunida aad tagto, una baahan oo kaliya inaad hesho koombuyuutar iyo Internet. Xarunteeda guud waxay ku taalaa Qatar, laakiin waxa duruusta lagu bixiyaa Internet-ka.
 -Waa maxay ujeeddada loo aasaasay Jaamacadda IOU?
 Waxa loo aasaasay in aqoonta Islaamka loo gudbiyo dadka muslimka ah iyo kuwa aan muslimka ahaynba. Iyada oo laga duulayo aragtidaas, waxa ay jaamacaddu bixisaa waxbarasho muddadeedu gaaban tahay (intensive), shahaadooyinka Diploma iyo Degree oo lagu qaadanayo barashada deraasaadka Islaamka, kuwaas oo gebi ahaanba bilaash ah.
 -Yaa arday ka noqon kara Jaamacadda IOU?
 Waxa arday ka noqon kara qof kasta oo go’aansaday ama doonaya in uu si sax ah u barto deraasaadka Islaamiga ah ee laga soo dheegay Quraanka iyo Sunnaha. Ardayda dhigata tiradoodu waxay ku siman tahay 80,000 oo arday,kuwaasoo ka kala socda 207 dal oo isugu jira dalalka horumaray iyo kuwa soo korayaba.
 -Maxaa ardayda laga doonayaa si ay wax uga bartaan Jaamacadda IOU?
Qofka doonaya in uu barto waxbarashada heerka Diploma loogama baahna wax shuruud ah oo la xidhiidha heerkiisa aqooneed. Balse, qofka doonaya in uu barto heerka Degree (BAIS), waxa shardi ah in uu haysto shahaadada dugsiga sare. Qofka aan haysanin shahaado dugsi sare ee doonaya in uu barto Degree (BAIS), wuu baran karayaa duruusta oo dhan, balse ma jirto gebogebada shahaado Degree ah oo la siinayaa, waxase taa beddelkeeda la siinayaa Diploma sare oo ay jaamacaddu ku caddaynayso in uu waxbarashadaas dhammaystay.
 -Qofku Degree ma ka bilaabi karaa jaamacadda isaga oo aan haysan Diploma?
Haa, wuu ka baran karaa qofku isaga oo aan haysan shahaadada Diploma. Waase in uu haystaa shahaado dugsi sare.
 -Ma jiraa wax xaddidaya da’da qofka doonaya in uu wax ka barto IOU?
 Maya, qof kasta da’da uu doono ha jiro’e, jaamacaddan wax wuu ka baran karaa.
-Luuqadda wax lagu baranayaa waa noocma?
Dhammaan duruustu waxa lagu baranayaa luuqadda Ingiriisiga, marka laga reebo luuqada Carabiga oo iyada maado ahaan loo baranayo.
 -Muddo intee le’eg ayaa lagu dhammaynayaa waxbarashada degree-ga?
Waxa la baranayaa muddo afar sanno ah oo aad shahaadada ku qaadanaysaa.
 -Imisa xiisadood (courses) ayaa la baranayaa xilli-waxbarasheed (Semester) kasta?
Waxa la qaadanayaa lix xiisadood (6 courses)
-Waa imisa lacagta isdiiwaangelinta xilli-waxbarasheed (Semester) kasta?
Qof kasta oo ku nool Somaliland iyo Soomaaliya waxa laga doonayaa afartan dollar ($40) oo ah feega diwaangelinta. Halka dadka doonaya inay bartaan shahaadada sare (Masters) iyo Higher Diploma laga qaadayo ($80) oo kaliya xilli-waxbarasheedkii kastaba (Per semester).
 
Wixii faahfaahin ah ee intaa dheer kala xidhiidh;
 
 

No comments: