Keli socoshadu haddii ay dadka dhibto, indhawaydba annigu waan
dheefsadaa, oo waxa igu da'a roob aan madaxa iyo maryaha qoyn, ee maanka iyo
maskaxdaba qooya. Roobkaasi inta uu i hayo waxaan halis u ahay inaan hogag iyo
haadaamo ku dhaco. Inta badana waxaan ku war helaa biib biibta gaadhi sanka
iila saaran, ama ruux i garanaya oo i hor joogsada.
Haddaba shalay ayuun bay ahayd markii aannu iska soo hor baxnay
haweenay tabaalaha waqtigu tagoogaha ka jabiyeen. Gu’geedu inkasta oo uu
soddonka wax yar ka gudbay haddana gabaw bay la gabax tidhi. Tallaabada sida ay
midba meel ugu witiq siinayso waxaad moodaa todobaatan jir caruur la’aan iyo
caydhnimo isugu darsameen. Indhuhu waa gudheen oo waxaad moodaa ceel gofnoobay
oo guyaal ka hor laga haajiray.Dhabanaduna waa xaalufeen oo waxa ka soo hadhay
laba kood oo soo taag taagan. Halka ay dabnuhuna qalayl daraadeed la
qar-qarxeen. Waxay jiidanaysaa laba caruura oo aan muuq dhaamin. Halka ay laba
kale oo rif rifanina daba ordayaan. War isuma hayso oo waxay rabto ayay ku
hadaaqaysayaa iyada oo hiin-faadhaysa.
Caad igama saarna caloolyawga ay qabto; cindigayguse wuxuu soo saari
laayahay cidda ay tahay.Waxaanan ka war wareegayaa inaan idhaa isku kay sheeg.
Inta aan dhab u fiiriyay ee aan maskaxda qaybta xusuusta qaabilsan aad u
tuujiyay, ayaa waxa ii soo baxay sawir haydh haydh ku jiro oo si walba uga
duwan keegan maanta. Haddana yeelkeeda’e waxaan ku idhi : Ma Hindaa? Inta ay
sidii wax yar naxay ii soo eegtay bay igu tidhi:
Haa, miyaad i garan laadahay Axmed? Anniga oo madax dhul ka ceshi ah
ayaan ku idhi: Kuma garan li’i ee maxaa kugu dhacay? Wuu I furay, wuu I furay,
wuu I furay!! Ayay si murugo iyo maroora dilaac leh ii tidhi.
Goormuu ku furay iyo muxuu kuu furay midna anniga oo aan odhan ayaan
ka dhaqaaqay oo aan dhabada qaadey. Xataa inaan ka dhaqaaqay war isuma hayn ee
sidii aan u sii xiimayay waxaan is arkay anniga oo dalaq idhi bakhaarkii oday
ku sheegeedu lahaa. Intii aan dhexda ku sii jiray waxaan go’aan ku gaadhay in midkaayo
maanta lafaha laga guro. Nasiib daro iyo nasiib wanaag mid ay ahaydba
meeshauguma tegin isagii. Ku yar oo u shaqaynayay ayaan ku idhi anniga oo
xayraansan: Mee kii Cismaan? Ma Sheekh Cismaan? Ayuu si hal haleela ii
waydiiyay. Sheekhna maaha ee shaydaanka gadhka dheeri halkee buu ka baxay?
Ayaan si kacsan ugu jawaabay. Subxaana-laah, qadafku ma fiicnee, wuu soo
noqonayaa ayuu si dejin iyo duridi ku jirto ii yidhi. Waayahay adeer inta aan
ku idhi, ayaan meel banaanayd salka la helay oo aan xiiq gooyay. Kii yaraana
shaah uu hore u cabayay ayuu halkeer firi-riqda kaga saaray. Cabaar intaan
xaraarada xajistay ayaan markii danbe is hayn waayay oo aan kii yaraa ku
halgaadey: Waar garashada illaahay kaa qaadye shaah noogu yeedh. Inta uu naxay
ayuu maqaaxi hortooda ahayd iiga dalbay, iigana soo qaaday.Waad mahadsan tahay
adeer inta aan ku idhi ayaan dhabanada qabsaday oo uu dhididku i hooray. Anniga
oo gagab gooyay ayuu Sh. Cismaan soo galay. Ladnaan baa dushiisa ka muuqata,
labeenina wajigiisa ayay ku dahaadhan tahay.Rays buu cagaha kula jiraa, roob
lacagina waa ku da’ayaa. Xaydh buu sidii dibida yeeshay, xalusna sidii
dumarka.Qosol aan dabnaha dhaafsiisnayn haddii uu igu bariidiyay. Kama qaadin
ee waxaan si adag ugu idhi: maxaad sidaa u samaysay? Inta uu i fahmay ayuu
banaanka iila baxay. Markaasuu si jees jees ah ii yidhi: Way kibirtay oo waan
iska furay. Intaan madoobaaday ayaan haddana cadaaday. Intaan qiirooday ayaan
haddana qaracmay. Intaan xayraamay ayaan haddana xanaaqay. Hase yeeshee anniga
oo aan eray u celin, warna isu hayn ayaan hortiisii ka huleelay. Haddii ay
xaaskiisii hore ku hadaaqaysay wuu I furay, wuu I furay. Waxaan is arkay anniga
oo ku hadaaqaya :Waqtigu nacasaysanaa. Waqtigu nacasaysanaa.. Waqtigu
nacasaysanaa.
Anniga oo baydkaa ku tasbiix-sanaya ayaan banaan iska fadhiistay.
Canjalada xusuusta ayaan dalaq rikoodhka siiyay. Dib baan u celiyay oo waxay
socotaba dhalinyarnimo markii ay gaadhay ayaan is taajiyay. Anniga oo aan iska
war hayn ayaan Aaah… Aaah ku waashay. Waxaanu ahayn dhalinyar dhib iyo dheefba
wada qaybsada. Waanu wada ciyaari jirnay waananu wada cawayn jirnay. Waanu wada
haasaawi jirnay; waananu kala haasaawi jirnay.Hindi waxay ka mid ahaan jirtay
hablaha bilic iyo bilig lagu majeerto ee xaadafadayada. Asluub badnaanteeda iyo
edab samaanteeda waxaad moodaysay culimadii hore ee Soomaaliyeed.
Dhawrsanaanteeda iyo dhibir-sanaanteedana waxaaad moodi jirtay dhal awliyaad.
Qof dulqaad badan bay ahayd oo haddii gacanta afka laga galiyo aan ku
qaniinayn. Kalsooni buuxda ayay ka haysatay bulshadii ay la noolayd, haba ugu
sii badnaadeen reerkooduye. Inkasta oo ay nala ayni ahayd, haddana annaga waxay
noo ahayd walaal iyo wehel rumaad. Hablaha ayay na bari jirtay, mararna nooba
haasaawin jirtay, oo hadda xaaskan aanu wada joogno is jamashadayadii iyo is
jeclaanshahaygiiba iyada ayaa door wayn ka qaadatay qaadirku ha ka abaal
mariyee.
Imisa nin oo sidii ay hanashadeeda u heli lahaayeen habeeno u dhafray
ayaan garanayaa. Bashiir miyaanu ku hadaaqi jirin marka ay maqan tahay, marka
ay timaadna miyaanu hiban jirin. Cabdi Faynuus miyaanu caashaqeeda cuntada
beryo uga go’in? Faysal Faqash miyaanu ka fikirkeeda maalmo la foorarin?.
Miyaanaan kor iyo hoosba u odhan jirin walee tan ninka helaa nasiib badanaa.
Calafku waa caleemo daad wada’e dhabcaalka aan kor ku soo sheegnay ee
lahaa: Way kibirtay ayay reerkooda ula timid. Aqoon guud oo aan u lahaa ayaan
hadlayaaye. Wuxuu ahaa nin danyara oo dadkiisa isaga dhex jira. Han iyo hirasho
toona ma lahayn. Haddii uu fikiro wuxuu ka fikiri jiray wax uu cuno iyo wax uu
cabbo. Dhoohniduna dhafoorkiisa ayay ka muuqatay.
Dadka intii taqaanay barigaa waa yaabeen. Ninba dhan buu arrinta u
fasirtay. Koox aan ku jiray waxaanu ka gayn waynay: Waa miskiin, Hindina dadka
tabaalaysan waa iska jeclayd. Wuxuu doonaba ha ahaadee, mashaqadii ugu darnayd
waxay ka timid Hinda reerkoodii oo si walba u diiday ninka. Waxayna kala
dooran-siiyeen inay iyaga u go’do ama ay Sh. Cisman Gadheere u go’do(Bariga
gadhka wuu xiiri jiraye). Talo ayaa ku cadaatay oo dhulka ayaa cidhiidhi ku
noqday. Asxaabtii ay soo ciirsatay ayaan ka mid ahaaye. Waxaanu isku
taxa-luujinay inaanu reerkooda ku qancino inay inanta dookheeda u tixgaliyaan.
Hase yeeshee waanu ku hungawnay oo waa nagu gacan saydheen. Wax aanu samayno
ayaanu garan waynay markaanu aragnay Hinda oo talo ku ciirsan tahay iyo Cismaan
oo halkeer dacayda laa-laadinaya. Mar baanu is nidhi Hinda ma ku tidhaahdaan
reerkiina maqal oo ninkan isaga hadh. Haddana waxaanu xasuusanay maah maahdii
ahayd “Walaashaa ma hubtide seedigaa ha colaysan” Markasanu ku nidhi: Hinda
arrinta go’aan ka gaadhideeda adiga ayaa iska leh, sidaas baanu faryaro bidix
kaga baxnay. Haddii ay arrintii cabaar rog rogtay waxay is tustay in ninkan
reerkoodu ku diidan yahay xoolo la’aan oo kaliya. Waxayna is tidhi: Haddii aad
la dedaasho oo uu xoolo yeesho reerkiinu waa iska ogolaan. Sidii baanay ku
go’aansatay inay isaga raacdo.
Maalmo dhawra ka dib, ayaanu maqalnay arrinkaa. Af kala qaad ha nagu
ahaato, haddana arooskeedii kamaanu baaqan ee waanu tagnay oo si wanaagsan baanu
uga soo tunay. Run ahaantii markii aan habeenkaa wajigeeda si fiican u dhugtay
way faraxsanayd, wayna murugaysnayd. Way deganayd, wayna didsanayd. Way
joogtay, wayna maqnayd. Isna halkeer buu ciridka faydayay caashana taagayay
cuqubo ku dhacdaygu(Waanagaa sidii dumarka u habaartanee).
Arooskoodii ka dib Inta ay dhexda marada ku xidhatay ayay ku dhiiri
galisay inuu dhididkiisa dheefsado, oo uu shaqo adag bilaabo.Hoodalay bay
ahayde markiiba shaqo ku filan ayuu helay. Waxay si dad-ban u dareensiisay waxa
laguu diidayaa inay xoolo yaraan tahay.Waxaanay ku dhalisay qorshe
mustaqbaleedyo badan oo ay ka mid tahay sidii ay guri lahaansho ah u dhisan
lahaayeen.Taasina ay ku iman karto dedaal dheeri ah oo uu sameeyo iyo xakame
bir ah oo ay naftooda ku qabtaan. Waxa kale oo ay xil dheeri ah iska saartay
hagaajinta qaab dhismeedkiisii xumaa. Jidhkiisii wada kurtinka ahaa ee ku
xaganayay ayay daleed iyo wax xalay la dhalay ka dhigtay. Surwaalkii dhuubnaa
iyo shaadhkii balaadhnaa ee uu isku xidhan jiray ayay ka dhigtay, oo dharku
sida uu isu leeyahay ayay isugu dul dhigtay. Ilaah baa na dilayee dhawr bilood
ka dib arooskoodii, waxaanu aragnay ninkii oo aan Cismaanba ahayn. Oo inta uu
hagaaskii ka ba’ay hilaacay, inta ay qoloftii ka dhacday quruxaystay. Inta ay
tuura-tuurihii ka ba’een toosay. Waxaananu mar kaliya wada nidhi: Waar ilayn
wuxuu naag uun buu u baahnaa.
Waa la isku wada baahan yahaye, Hindi waxay halgan adag u gashay sidii
ay duruufaha nololeed ee ku xeeran uga gudbi lahaayeen.Waxaanay dhitaysay biil
maalmeedkii nolosheeda, iyada oo iska ilowday waxa inta badan dumarku wajigooda
ku dhumuuqaan, lacagahana ku kharash gareeyaan. Xataa haddii ay xanuun qabto
way qarsan jirtay oo qofkii il dheer ayuun baa foolkeeda ka dareemi jiray.
Cismaan Gadheerana inta uu halkaa soo fadhiisto ayuu marka uu ugu roon yahay
odhan jiray: Maanta waad yar caajisan tahay Hinda. Mayanee, waan yar daalanahay
inta ay tidhaa ayay kici jirtay oo ay cunto iyo cabid u keeni jirtay. Aaah,
Haddii uu soo dhinac fadhiisto oo uu xanuunka la qaybsado ma ciil bay qabi
lahayd.
Shan sano oo ay afar caruura ugu dhashay haddii ay nolosha caynkaa ah
ku jireen. Mar kaliya ayaa albaabadii risiqu isu wada balaqeen. Odaygeedii
wuxuu ku hilaaciyay bakhaar laba af leh oo bagaashka lagu soo rogo, laguna
gado. Lacag sun-sumaysa ayaa sanka uga soo gashay. Adduun la iskuma haleeyee,
sanadkii ku xigayba ilmahoodii shanaad wuxuu ugu dhashay guri ay leeyihiin oo
ay dhisteen.
Dhixirkii ay Hindi dhexda ku xidhatay maalintii ay aqal galeen, waxay
dhigtay maalintii ay gurigooda ku hoydeen. Muraayadda markii ay isu eegtay
waxay is aragtay daqaradii waayuhu ku dhufteen oo wajigeeda wax aad qaarado
moodo ku sameeyay. Waxa kale oo ay aragtay timaheedii kala rognaan jiray oo rif
rifmay iyo dhabankeedii dhaylada ahaa oo qolofi fuushay. Inta ay muuqaalkaa ka
murugootay ayay haddana aragtay caruurteedii oo ku ag ciyaaraysa, markaasay
daraadood dhib kasta ku ilowday, oo ay la faraxday, la muraaqootay, lana
ilmaysay. Waxaanay cindiga ka jeclaysatay odaygeeda oo galabtaa la joogi lahaa,
lana wadaagi lahaa jawigaa barakada iyo barkhadda leh.
Bilo haddii ay ku jireen nimcadaa aan lagu waarayn, Hindi waxay
dareentay doogo iyo dakharo waayihii adkaa ee soo maray kaga tageen oo ku soo
kacdoomaya. Maantaa inay qarsato waxay ka door biday inay is dawayso, maadaama
uu waqtigu u saamaxayo. Sidaas bayna ku dhaqaaqday oo ay dawooyin ugu bilaabmeen.
War la isuma hayee, intii ay Hindi ku foognayd is dawaynteeda, Cismaan
gadheerana wuxuu ku gaaf wareegayay hablaha soo kacaya. Isaga oo asxaabtiisa ku
qancinaya in xaasku muddaba ka xanuunsanayd, oo uu iska sabrayay. Maalmahaa
wuxuu la soo baxay dabeecado yaab leh oo aanu lahaan jirin. Waxana ka mid ahaa
cadho badnaan, canaan badnaan iyo saluug badan oo uu ka muujinayay wax kasta oo
loo keeno. Waxaanu uga dan lahaa xaalad abuurnimo, si uu hadhaw ugu qiil helo
guurka labaad ee uu cindiga ku hayo. Hadalkiisu ma badnayn guriga marka uu
yimaad, indhihiisuna waxay ku mashquulsanaan jireen raadinta wax baylahsan oo
meel yaal. Halka dhegahiisuna u dheg taagi jireen maqalka jabaq yar oo aan
macno buuran lahayn. Islaantiisa waxa ku dhacay u qaadan waa iyo amakaag,
waxaanay is tidhi: Malaha waayihii adkaa ee idin soo maray baa raadadkan kaga
tegay, oo wuxuu u baahan yahay dhakhtar iyo dawooyin. Arrintaa markii ay la soo
qaadayna inta uu dar illaahay isaga xanaajiyay ayuu ku yidhi: Bidco iyo adiga
la idinma kala ag waayo waligiin. Wuxuu gaal sameeyay baad afar iyo labaatanka
saacadood la soo taagan tahay, ee waxa ka bax oo caruurtu maxay salaaddii subax
masaajidka u tegi waayeen? Inta ay naxday ayay ku tidhi: Way yar yar yihiin,
waana jiilaal oo guriga ayay ku tukadaan. Inta uu hanqalka la soo kacay, Kitaab
agtiisa yaalayna soo qaaday ayuu ku yidhi: Adigu quraankii Madarasada maxaad u
joojisay?. Markasay iyada oo afka haysata tidhi: Ma dayn ee waanigii
xanuunsanayay, haddana waan bilaabi doonaa. Insha alla dheh inta uu yidhi. Ayuu
kitaabkii halkiisii isaga celiyay markii ay baxday. Nin dar illaahay u seexday
ayuuna iska dhigay. Daartu ku duntaygu (Waanagaa haddana sidii dumarka u
habaartanee).
Dhawr bilood ka dib, ayuun bay markii aanu maqalnay wuu guursaday, af kala
qaad aan ka yarayn kii guurkiisii hore ayaa nagu dhacay. Hinda waxaan uga
baqnay wareer iyo waali, isna cuqubo iyo cidhib xumaan. Ubadkoodiina baylah iyo
basan-baas. Waxaan aad u jeclaystay la kulankiisa, bal si aan dareenkiisa
arrintan ku aaddan wax uga ogaado. Maalmo ka dib, haddii aanu is aragnay waxaan
ku idhi: Maxaa kugu kalifay inaad xaaskaagii waqtiga adag kula soo martay la
guursato? Waxaan eegayay inuu yidhaa: Qof xun bay noqotay. Wuxuuse yidhi: Waan
awoodaa inaan laba xaas wada qabo adduun ahaan. Midda kale Hindi waa iska yara
xan- xanuunsanaysaa. Waxaan si qiiro leh ugu idhi: Hindi miyaanay kugu raacin
xoolo yaraan, miyaanay reerkoodii kaaga soo gu’in, maxaad abaalkeedii ka
dhigtay? Wuxuu si ay mana sheegasho ka muuqato iigu yidhi: Abaalkeedii guri
wayn iyo biil ku filan ayaan ka dhigay. Markan arkay isaga oo isla quman, ayaan
nabad galyeeyay, inta aan madaxa ruxay, shantana dhabanada saaray, ayaanan ka
huleelay meeshii.
Todobaad ka dib, waxaanu si ku talo gal la’aana u kulanay Hinda oo
tukaan ka soo baxday, aragtideeda waan ku farxay oo waxay i xasuusisay
beri-samaad, haddana waan ka naxay xaaladda adag ee foolkeeda ka muuqatay. Is
nab-daadin ka dib, anniga oo aan waxba waydiin ayay igu bilowday:” “Axmadaw
abaal raaga rag ma leh. Wixii aan ehel iyo asxaaba uga go’ay; wixii u jidhkaygu
u qayirmay, jamaalkayguna u qalalay, wixii aan habeeno u seexan waayay,
maalmana u silcay, Wixii aan naf hurka u sameeyay ee alle igu ogaa, waxa abaal
la iiga dhigay minyaro iyo mana sheegasho. Waxaana la ii sii raaciyay canaan
iyo cag juglayn. Haddii aan la iba furina waxaan taaganahay Alxamduli-laah.
Waxaanse ku leeyahay walaalkay baad tahaye: Xaaskaaga dulmiga iyo deel-qaafka
waligaa ka ilaali, debeca iyo dulqaadkana la ogow. Aaaaah, Erayadan calaacalka
iyo caqli badnaanta isugu jiraa waxay igu rideen miyir door-soon, waxaanay iga
keeneen illin. Iyadana neefsi bay u noqdeen oo waa yar nafistay sida foolkeeda
iiga muuqatay. Hadalba inta aan cabaar I aamusnaa ayaan mar danbe ku idhi:
Walaal sabir oo dul-qaado. Haye, ee nabadeey reerkiina igu salaan, bay i tidhi.
Maalintaa iyo shalay markii aanu kulanay ee aan garan la’aa waxa u
dhexaysay wax sanad ka yar. Hinda abaalkeedu ma wuxuu ahaa in Taj-maxaal loo
dhiso, mise in minyaro lala guursado?
Xanuunada duruufuhu ku keeneen ma in loogu dulqaato ayay ahayd mise in
lagu deedifeeyo? Ma in la furaa bay istaahishay mise in lagu faano? Naf hurka
ay samaysay ma in lagu necaa bay ahayd mise in lagu majeerto? Adduunka ay
beeridiisa lahayd ma in loogu mana sheegtaa bay ahayd mise in lagu maamuuso?
Diinta illaahay ma wuxuu u soo dejiyay in Hinda lagu addoonsado mise in lagu
dara-jeeyo?
Annaaniyad ka wayni miyay jirtaa in ninku naagtiisa oo bukta inta uu
ka tago mid kale oo caafimaad qabta garabkeeda seexdo? Bal adba !!
Axmed Ismaaciil Maxamuud (Axmed Deeq)
Awliyo177@hotmail.com
Alla Mahad leh
No comments:
Post a Comment