Salaan, araar iyo guud-mar
labada dhinaca ka dib, Ninka “ Ma waalida mise wareerka”, Waa siday yidhaahdeen
qoladii xaggaaga ka socotay. Qoladii xaggayga ka socotayna waxay tibaaxeen si
ilbaxnimo ku jirto sidan;
“Ha na odhan ma waalida mise wareerka’e waxaad na
tidhaahdaan horta yaa waalan?” Isla markiiba waxaa bilaabmay, is af-garanwaa
iyo kala dhicid labada dhinac ah. Waxay hoos-hoos intaa iskugu odhanayaan
hadalo goos-goos ah oo ninba marka uu cabbaar ilaa shan-daqiiqo aamuso uu mar
hal eray ku yidhaahdo saaxiibkiisa ag-fadhiya. Waxa hadalladaa inta ogaal-kayga
ah ka mid ah; “oo miyey waalan yihiin?” “Maxaa ka si ah” ‘bal ka sitee’ ‘Adba’
“U malee” “Ugu dhaaro” “wadhi” “Umuur” iyo qaar kale oo aad looga helo markaan
kaligay ugu sheekaynayo nafta.
Waxa marag-ma-doon ah in
labadeena qolo aynu midkeenba gaarkiisa aad ugu kala kalsoonahay, laakiin haddana
aad mooddo inay iyagu kaa saxsan yihiin marka loo sii fiirsado. Ha moodin saxsanaanta
tii tooska ahaan jirtay. Waa mid dhexda ka qaloocda oo sidaad moodayso inaad
waddo toos ah u marayso, ayuun baa markay xaafadaha qaar dhex-marayso tuur-tuur
iyo jeex-jeex iyo laab-laab miidhan noqotaa. Haddaad la sii socotana, haadaan
iyo godad iyo boholo kala waaweyn bay kugu ridaysaa.
Gartii aynu ku soo noqo;
waxa inoogu dambaysay, kala shakigii. Waxaa intaa ka dambeeyey, in dhowr jeer
la kala ballamo. Meelo kala duwanna lagu kulmo. Ilayn gar qaloocda meel la
fadhiistaa waxba kama tarto!. Waxaa tiro dhaafay meelaha la iskugu yimaaddo
arrintan awgeed. Waxa dhacda mararka qaar raggii ku balansanaa in gar la galo,
ay isku arkaan meelaha hubka lagu iibiyo. Dabeedna uu nin waliba is-idhaahdo,
“Ma ninkan hubka iibsanaya ayaydun meeshii isugu iman kartaan!”. Dabadeedna
shakigii sii waynaado, sii naaxo, sii ballaadho. Ciyaar shoodhe-khiyaamo la
yidhaahdo ayaa la wada dheelayaa oo midba midka kale markuu ka badiyo, ku
tilmaamaya wax waaalan. Dadkii kale ciyaalkoodii iyo kuwani markay iskuulka
isku yimaaddeen, waxay kala barteen, eraygan “Waad waalan tahay.” Muddo ilaa
toban sanno laga joogana erayga waad waalan tahay, wuxuu dadkii xagooda la
noqday wax lagu faano, la iskuna amaano.
Hadda I fahan, wali
garteenii natiijadeedii lama gaadhin, si saxana cidi wali ugama fadhiisan.
Intiiyoo dhanna aniga uun baa dhinacayga kaaga akhriyey siday ila tahay.
Faalladaa badan marka laga
yimaado….La soco.
W.Q: Axmed Cabdiraxmaan
Cumar
No comments:
Post a Comment