Nafteyduun-bay ila xantaan - Qaybta 2aad

Hase ahaate, maalmo kadib waxa isa soo canaantey Nuur-qurba-joog isaga oo yara dareensan inuu khaldamay ama uu meel ka dhacay Oday Faarax, waxaanu Oday Faarax ugu  yimid goor barqo ah Makhaayadii uu ka qaxweyn jireyn ee uu sida joogtada ah u iman jirey, markii uu Nuur  isa soo taagay makhaayadii oo barxad dibada ah lagu bunaynayo ayuu bariidiyey waxaanu yidhi “Shir bariidsan” Waxaana loogu jawaabay soo fadhiiso.

In yar kadib markii uu shaaheeyey waxa uu la hadlay Oday Faarax waxaanu ku yidhi “Waar Oday Faarax maalintii dhaweyd waynu isku dhacnay ee aynu kala raali ahaano, isaga oo isticmaalaya ereyo ay ka mid yihiin IAM SORRY waan ka xumay iyo ereyo kale, ayaa Oday Faarax oo qoslaya ayaa ugu Jawaabay waar adiga ayaa iska didsanaa ee annigu waxba kuuma qabin, sababta oo ah anigu waxaan ahay nin weyn oo waayo-araga ragguna haddii uu da’adaydan oo kale gaadho waxa ka soo hadha waano iyo dulqaade bal ii waran.

Markaas ayuu Nuur-qurba-joog yidhi “Walaahi ama qudhaydu qurbe iyo quruumo kale ayaan la soo dhaqmay oo waxyaalo baddan iga bedelay, iyaduna waayaheeda ayey leedahay ee waxaan kuula socday inaynu is-raacno oo aan casuumadii maalintii hore inaga baaqatey aan maanta fuliyo, dabadeed Oday Faarax oo u arkaya haddii uu diido ama uu cudur daar kale keeno inay gelin doonto Nuur-qurba-joog shaki iyo inuu caloosha wax ugu sii-hayo ayaa yidhi ‘Waayahay oo waan aqbalay”.

Dabadeed in yar kadib, ayaa la israacay waxaanay raaceen Gaadhi uu watay Nuur-qurba-joog oo noociisu yahay CRESTA indha-cadde,waxaanay mareen waddada hal-bowlaha ah ee marta badhtamaha magaalada Hargeysa, isla markiiba waxa uu Nuur-qurba-joog ku bilaabay Oday Faarax su’aalo is-daba jooga oo ahaa kuwii ay maalintii hore isku af-dhaafeen, iyada oo aan shaki ku jirin inuu Oday Faarax dhibsanayo su’aalahaas. Waxaanu Nuur-qurba-joog ku yidhi Oday Faarax “Waddadiinu ma noocana, poolshit, oo dhibaato ayaa idinka haysata,Traffic-giinu ma kuwan bilaa macnaha ahba? Maxay qabataa dawladiina hoose? Ohhhhhhhhhhhhhhhhhhhhh SORRY! Sideed halkan ugu nooshihiin.Iyada oo aad moodo Nuur-qurba-joog inuu dal kale u dhashay, hasayeeshe Oday Faarax wuu ka gaabsaday inuu ka jawaabo su’aalaha uu Nuur weydiinayey.! Isaga oo ka baqaya inay sidii maalintii hore is afdhaafaan.

Markii in yar la socday ayaa waxay soo gaadheen Cusbitaalka Guud ee Magaalada Hargeysa waxaanu Nuur yidhi “Anigaad ila yaabaysaaye, Cusbitaalkiinuba waa sidii uu Ingiriiskii kaga tagay”.

Dabadeed Oday Faarax oo aad moodoo inuu kayara diirey ninkan canaantan aanu xaqa u lahayn kala daalay ayaa ku yidhi oo adeer waxaan ku weydiiyey markii aad London Joogtey kii aad ku jirtey kan ma ka qurux badnaa! Dabadeedna Nuur Gaadhigii ayuu hakiyey oo waji cadho ka muuqato ayuu ku soo eegay Oday Faarax, markaasu ku yidhi “Oo yaa kugu yidhi Cusbitaal ayuu ku jirey, mise xanuun ayaa laygu kaa sheegay,” Oday Faarax ayaa kugu jawaabay “Yacnii waxaan uga jeeda oo aan maqlay xagaa qurbaha qofkastaabaa waxa uu leeyahay dhakhtar u gaara oo caafimaadkiisa daryeela, waxaanan u qaatey in dhakhtarkaas loogu tago meel Cusbitaal ah”. Markaasu Nuur-qurba-joog ku dhuftey Qosol….Qosol……Qosol………..Qosol……………Qosol, markaasu yidhi “Waxaan u qaatey si kale iga raali noqo”, isla markaana waxa uu u galay amaanta dhulkii uu ka yimid ee qurbaha, isaga oo leh qof waliba waxa uu xaq ugu leeyahay dawlada Guri uu galo, Biyo iyo Laydh uu helo, Dhakhtar u gaara iyo Lacag masaariifa, shaqo iyo waxyaabo kale. Intaas kadib ayaa Oday Faarax ku yidhi “Waar horta anigu Nuuroow boqol su’aalood ayaad I weydiisa oo waan kaaga Jawaaba, anigu hadaan su’aal weydiiyo maxaad uga booda?” Dabadeed Nuur-qurba-joog ayaa ugu jawaabay Oday Faarax “Adeer dadkeena ayaa bodow ah oo aan aqoonin baratocolka iyo sida dadka loola dhaqmo, waxaanad mooda inuu hadalkoodu had iyo goor uu yahay mid ku weeraraya”.

Waxa hadalo goos goosa la isweydaarsado kadib waxa la gaadhay xiligii qadada waxaanay tageen hudheel ka mid ah hudheelada Magaalada Hargeysa, halkaas oo ay ka qadeeyeen. Dabadeed markii ay ka baxeen hudheelkii waxa waddada ka sii raacay nin la yidhaahdo Ducaale oo ay isgaranayaan Oday Faarax, dabadeed Nuur-qurba-joog ayaa ku yidhi Oday Faarax “Qaadka nooce ayaad cuntaa”, markaas ayuu Oday Faarax ugu jawaabay “Adeer waxaan cunayaa laba Mijood oo Dadar ah, oo waxa la yidhi Jabiska dhaadheer dawo ayaa lagu soo buufiyaaye”. Waxa uu labadii mijood uga qaaday Kabadh suuqa ku dhex yaala, markaasu yidhi SORRY waar Oday Faarax inankan aad saaxibka tihiina u soo qaad laba Mijood markaasu Ducaale soo qaatey ‘Rubuc Jabisa”, sadexdii ninba way israaceen waxaanay fadhiisteen guri gaara. Markii qaadkii la furtey in cabaarana la kaftamay ayaa waxa uu Nuur-qurba-joog ku yidhi Oday Faarax “Waxaad tahay ninweyn oo waayeela oo waxaanan kaa doonayaa tallo,taas oo uu biyo dhaceedi noqday inuu doonayo Nuur inuu Guursado gabadh miyaro ah” markaasu Oday Faarax ugu jawaab celiyey “Adeer inta aynaan tallada gudo-gelin, aan kula yara kaftamee waxa la yidhi qoladiina qurba-jooga ah ‘Dumarka ayaa ka adagee haddii aad la guursato hadhoow markaad noqoto miyaanay ku eryeyn”.!

Nuur-qurba-joog wuu ka booday hadalkaasi waxaanu yidhi “Oday Faaraxoow waan ku ixtiraamaye ee horta maxaad hadalka qalafsan ii tidhaahda?” Oday Faarax ayaa ugu jawaabay“Kuma idhaahdee malaha Nuuroow adiga ayaa Af-soomaaligii ilaabay”.

Ninkii kale ee la socday oo ay Oday Faarax is Kaftan yaqaanaan ayaa waxa uu ku yidhi “Waar haddii halkaa qurbaha lagaga soo adkaaday waxa uu isba halkan ka doonayaa mid uu ka adkaade ninka gabadha u doon”

Ninkii Nuur-qurba-joog ayey karaarta kaga dhegtey oo cadhooday,waxaanu ku yidhi Ducaale “Waarkaagan yuslaskii xagaad naga soo raacday?” dabadeed qosol ayaa la isku daray, waxaanay ku yidhaahdeen “Waar Nuur miyaanad naga xishoonayn ileyn annaguna waxaanu nahay Sodogye”.

Dabadeed Nuur oo ay ka muuqato cadho baddan ayaa waxa uu ugu jawaabay “Tallo ayaan idin soo bidaye ma inaynu iscayno ayeynu meesha u nimid”.Dabadeed Oday Faarax iyo Ducaale oo aad moodo inay ka sii xanaajinayaan ama aad moodo inay ku dheeldheelayaan ayey si wada jira ugu yidhaahdeen “Hadaad tallo na weydiisay ninka qurbaha ka yimaada waxba laguma xidhee ciddii aad doonto weydiiso gabadha!. Hana ku odhan gabadha reerkooda waxaan dejinaya Caasimada Somaliland ee Hrageysa,balse waxaad ku tidhaahda waan dhoofinayaa.Waxa kale oo ay u raaciyeen markaad gabadha dhisato ha ku raagin waddanka si aan lagu fahmin ee waxaad tidhaahda halkaas ayaan uga soo ashkatoonayaa sida caadada idiin ah”.

Nuur oo aad u kacsan ayaa waxa uu weydiiyey labadii Oday “Waar waa maxay sidaan lagu fahmin?” Markaas ayey ugu jawaab celiyeen “Waxaanu uga jeedna intaanad Noqonin Biciid Bilaa Geeso Ah!”. Markaas ayuu yidhi Nuur “Waar markii hore ayaa la idinqaataye ma imikaad Xayaawana igu tilmaamteen?” Markaas ayey ugu jawaabeen Oday Faarax Iyo Ducaale “Waar qoladiinaan qurba-jooga ahi markaad qurbaha ka timaadaan waxaa la idinku naaneysaa “Biciid Geeso leh”, laakin marka ay lacagtu idinka dhamaato ee aad muddo dalka joogtaana waxa la idin yidhaahda “Biciid bilaa Geeso ah”!.

La soco qeybta 3aad ee sheekadan oo aad u xiisa badan………………..

Mustafe-Jannaale

Email: janaale94@gmail.com