May ogayn markii uu haasaawaha
guurkoodu u socday, isna wuu ogaa in aanay sirtan iibiyaha ka gadda
mooyee cid kale ogayn, wuu hubay in aanay ogaan doonin, siduu filaayay ayaaba
dhacday oo caawaba waa habeenkii aqal galkooda. Guri aad u wayn oo ku yaala magaalada
ayuu ka dhacay aqal galkoodu, farxad, damaashaad iyo mushxarad ayay ku kala
dareereen labadii qoys ee habeenkaa lagu soo casuumay xaflada aqal galkooda.
Dugsiga sare ayay ku jirtay maalintii u
horaysay ee ay is barteen, isna barigaa meel ayuu si ku meel gaadh ah uga
shaqayn jiray, markayse dhamaysay isna shaqo tii hore ka fiican helay
ayay go’aansadeen in ay is guursadaan. Dabeecadiisa iyo dhaqan wanaagiisu waa
ta soo jiidatay, ta labaad reer aad u fiican ayuu ka soo jeeday taas ayaana
siisay kalsoonida ugu baddan ee ay ku qabtay.
Farxad, kalgacal, iyo dhoolacadayn
joogto ah ayaa gurigii hadheeyay. Waxay ku noolaayeen nolol aan is maqal iyo
kala danbayn dhaafsiisnayn, kuna kooban isku soo hillow marka la kala maqan
yahay iyo farxad marka la wada joogo . Maalinba maalinta ka danbaysa waxa
siyaadayay farxadooda iyo raynrayntooda. Kadib marka uu shaqada ka yimaado inta
badan guriga ayuu joogi jiray marka laga reebo habeenkii oo uu mar yar bixi
jiray taas oo dhawr cisho markay waydiisay halka uu tago uu ku jawaabay in ay
wiil ay saaxiibo yihiin u tagayo. Arrintan caado ayay u noqotay habeen kasta
xiligaas marka ay gaadho wuu yar baxaa soona noqdaa saacad a ma laba saac ka
dib, habeenada qaar wuu ku raagaa oo goor uu soo hoydaba ma ogaato.
Shaki ayaa galay, werwer ayay ka fadhiyi
wayday habeen walba, murugo iyo cidhiidhi ayay dareentay mar kasta oo ay
waydiisana isla jawaabii ayuu siiyaaa “Asxaabtayda ayaan u tagaa, oo aan
arrimo ka wada hadalnaa shaqada ah!”
Habeenadan danbe aad buu ugu dheeraada
maqnaanshihiisa, marka uu soo noqdana qaylo iyo gacan ku dirir ayuu ku bilaabaa
iyada!.
Dilmo ayaa u noqotay joogto iyo wax ay
habeen walba sugto, way adkaysan kari wayday una qaadan la’dahay sida uu isku
badalay, qof naxairis badan ayay ku ogayd ma garanayso goorta uu ma naxaanka
noqday, wuu jeclaan jiray ma garanayso goor ay cadaw u noqotay!.
Farxadii
iyo raynrayntii murugo iyo illin joogto ah ayay isku badashay.
Caawa waxay go’aansatay in ay
ogaato bal halka uu tago habeen walba, markii uu albaabka ka baxay ayay ka daba
baxday waxa uu kaxaystay baabuurkiisii isla markiiba way daba dhaqaaqday maba
uu fogaan ee meel guriga agtiisa ah ayuu ka leexday istaagay, inta uu ka soo
dagay ayuu furay khaanada danbe ee gaadhiga kalana soo baxay wax u eg dhalo,
inta uu furka ka jaray ayuu isku qabtay ilaa uu dhibic qoyan u diiday
quraaradii. Inta uu ku celiyay gaadhigii ayuu fuulay baabuurkii oo kaxeeyay, oo
wadada qabsaday.
Naxdin ayay dhaqaaqi kari wayday, u
qaadan waa ayaa ku dhacay, imika ayay fahantay sababta habeen walba marka uu
baxo u soo hoydo isagoo dhallan roggan, sababta marka ay albaabka ka furtaba uu
dhirbaaxo ugu salaamo cayna u raaciyo.
Nasiib darro ayaa haleeshay, waxa
ay caloosha ku sidaa ilmihii u horeeyay ‘curradkoodii’, ilmo fara badan ayaa
indhaheeda ka soo daadatay waxay quus ka istaagtay la noolaanshihiisa danbe,
way soo luuday oo iska timid hoygeedii, mise isagii oo qayladiisa jaarkii oo
dhami isku soo baxeen ayaa hortaagan irrida guriga. Way naxday markay aragtay
xaalada uu ku sugan yahay degdeg ayay xagiisa ugu soo dhaqaaqday iskuna dayday
in ay galiso guriga oo ceebtiisa qariso balse mabuu sugine markuu indhaha ka
qaaday ayuu feedh ku bilaabay, laagna u raaciyay, way dawakhday oo odhulka ayay
ku dhacday.
Subixii danbeayay baraarugtay iyada oo
dhaqtarka jiifta hooyadeed oo ooyaysaana kor taagan tahay, isla markiiba waxa u
soo galay dhaqtarkii oo u sheegay in ilmihii ay caloosha ku siday dhintay!.
Isaguse war iyo wacaal kama hayo xaalada ay ku sugan tahay.
Qoyskaasi waa qoys soomaaliyeed , muxuu
noqon karaa mustaqbalkoodu, noloshooda danbena mid noocee ah ayay noqon
doontaa?!!.
Allaa mahad leh
Muna Axmed Cumar
Email: Muna_gafaneh@hotmail.com
Blog: www.muna19.wordpress.com
No comments:
Post a Comment