Gabay: BOQOL BUUL

Ba’da gabay cabddoow waayadani, maan balaysimine

Ma binaynin maansooyinkaan , baarcadayn jiraye

Bismilaahi caawaan idhoo, aan babinayaaye

Iga qabo bartii gabay lahaa, baaxir baad tahaye

Baaqbaan sidaa jaamacaw, aan balwinayaaye

Bulshadeenan feeraarsanbaan, ugu baloolayne

Bu’da waxaan ujeedada ku ladhi, baanisaha yaale

Waataa lakala baadayee, laysu baalnixine

Meeshii banaan looyiqiin, maanta laga baydhye

Babacbaa lawada fuushanyahay, buuro fiiqdheere

Bohol iyo waxaa laysku jafay, buundo kala dheere

Dabinbaa baraadli’I gondaha ,loola boobtagaye

Boqnahaa warmaha laysku jaray, biimo yaab badane

Bal ufiirso miidaan galbeed, waa bar kumataale

Afartaa ammuuraha berriga, beyd ma ka iftiinshay

Ma bayaanshay muurtida cabddaw, waa bayuur dhabahe

Afarkalena waa baabi iyo, buugga gaalada e

Baarliin warkii nooga yimid, Room bidhaamisaye

Bililiqo warkoodii ku faaf ,boorso ugu taliye

Buuqoodi  waa nagu batee ,baabiiyey tidhiye

Inta nabad ku bood-boodaysana, baajiyey tidhiye

Buruudkooda kala daadiyoo, bururiyey tidhiye

Beel-land u kala daajiyey ,baariis soo tidhiye

Baarqabkooda idin diidayana, bohoniyey tidhiye

Boqolbuul u kala waaba bay baaq ku soo tidhiye

Isticmaar  boggiisii ku rida, baaca hoostiisa

Aan birayno bay reer galbeed, soo bayaansheene

Aan bislaysanaa laysku wacay, waa bilaash yaale

Halla booba baa laysku yidhi, yaanu baarixine

Waxaa qiilka laysugu banbaxay, maahmaahdii beriye

Nin bukooday boqol waa u talin,  loo barkimo dhigaye

Afartaa burdaha gabayga dhaha,  baaci suugaanta

Afarkalena waa baabi iyo, booli-qaataha e

Madaxnimo intay boobayeen, bayda loojaraye

Sidii adhi banaan daaqayoo, goor barqin ah joogaa

Bartii loo duwaba waa kuwaa, baydhayoo tagaye

Inuu bahalba meelaha ku jiro, burka may dayine

Buste iyo waxaa loo huwiyey, buur karbaash leege

Intay baho u doodoodayeen, bayr lawada galiye

Bilaalaa wax lagu siinayaa, bidhiq ah koobkiiye

Barkimada waxay ugu hurdaan, waa baraad li’iye

Bootadaba looguma dareen, amarka baabiine

Booraanta loo qoday ma oga, biidhi qaatuhuye

Baashaalka waa kaa u boggay, biribirqayntiiye

Bulbulkiyo shabeelkiyo ma oga, bahalkan boobaaya

Bidixday ka joogaan warkani, loogu baratamaye

Bugcadooda nimankaa holladay, way u bu’ayaane

Billaawaha nin qaatoo hadlaba, beledka laga waaye

Baqti iyo waxay daaqayaan, dacarta baalkeede

Waxa ay la baabyiin cabddaw, waa dar baaliyahe

Gabadhii isma og loo baxshee, beri la soo sheegay

Iyadoo berriba loo tashaday, bixis dalaaqdeeda

Misna beydka sii asashayee, aan baddaa haynin

Waxba yaanan meerisyada ku badin, baas canaaneede

Biyadhaca warkiisii idhee , waa ba’ iyo waawe

Waxaan baab gunaanada ku xidhi , baaqigaa hadhiye

Baqashii fardaha doonatee, beegsiga ismooday

Siday beenta ugu dhaadatee, baar isugu feedho

Alleylehe baqool reer galbeed, biid lawada moodye

Ninka ulaha boocda ah loo badshaw, baadibaad tahaye

Bishmahaagu waxay taransadaan, berriba waad sheegi...

Waxa tiriyay Abwaan Axmed M. Faarax (Badeed)