Qayla-dhaantu ma sas baa, mise waa saadaal dhab ah – W/Q. Siciid Jaamac Xuseen.

Laba qoraal oo isku mawduuc ka wada hadlaya ayaa ku soo kala baxay mareegaha ‘Somalilandpress.Com’ iyo ‘WardheerNews.Com’.  Kan hore oo Af-Ingiriisi ah waxaa qoray Dr. Cabdishakuur Sh. Cali Jowhar, kan kale oo Af-Soomaali ahna waxaa qoray Dr. Maxamed Daahir Afrax.  Labaduba waxay ku nuuxnuuxsanayaan in dawlad qarameedkii ay ummaddu nafta ku naawilaysay (waa 'Maandeeqdii’ muddada dheer loo heesayay) in ay dhowaan soo noolaato iyadoo xooggan oo dardar qabta ay si aan muran ka iman karin usoo bandhigeen in ay maanta mindidii dul saaran tahay oo lala maaggan yahay in la kitfo oo laga yeelo  “beri bay jiri..jirtay.”  Ciddii arrintaas si dhab ah u danaynaysa waxaan kula talin lahaa in ay qoraallada labadaas aqoonyahan si deggan oo miyirqab leh ku akhristaan, ku noqnoqdaan oo si weyn uga bogtaan intaanu dhambaalkay wadaan go’aan degdeg ah oo sar-ka-xaadis ah ayna ka qaadan.  Warku ha innagu duxo oo si weyn ha innoogu duxo intaynaan talo ka gaadhin.  Anigu qormadan gaaban waxaan uga dan leeyahay inaan digniinta ay bixinayaan iyo qaylodhaanta labada oday gacan buuxda ku siiyo anigoo khatarta ay la fajaceen sii iftiiminaya.

Kuwa Maanta Mindiyaha Kuu Lisanaya

Ama gumeysi ku sheeg, ama shisheeye ku sheeg, ama nacab ku sheeg .. iyagu ma kala jecla magacaad ugu yeedhid mar haddaan erey bixintaasi aanay wax carqald ah ku keenayn qorshaha ay wataan iyo waxa ay kula maaggan yihiin. In yar taariikhda dib u raac. Qarnigii 19aad badhtamihiisii Soomaalida oo reero teel teel ah u kala yaal ayaa gumeysiga Yurub u yimi oo kala googoostay, xaydaan u kala samaystay. Kolkaas ayaa dhulkii Soomaalidu degganayd ee feedhaha isku hayay ee geeska Afrika ku yiil loo kala qaybiyay waaxyo midba gumeysi haysto oo ka taliyo sidatan - Soomaalida Biritayn, tan Faransiiska, tan Talyaniga. Dalkii iyo dadkii waxay isu rogeen ‘dawlad-ku-sheegyo’ gumeysiga reer Yurub kala haysto oo dantooda iyo siyaasaddooda lagu maamulo oo falagooda ku meera. Afrika iyo Aasiyaba taas oo kale ayaa ka socotay.

Maxaa Iska Dooriyay Xaaladdaas?

Dawladihii gumeysiga Yurub ayaa isqab dhaafay, qaybihii ku heeshiin waayay, kala awood iyo itaal roonaaday, damcay inay marka hore ismuquuniyaan, ka dibna u soo jeestaan ummadihii ay kala haysteen. Waxaa dhacay dagaalkii 1aad iyo kii 2aad ee adduunka (1914 - 1918 & 1939 - 1945) way isku rafteen oo isku riiqmeen. Ka dibna ka badin waayeen inay iyagu heshiis nabadeed wada galaan. Ururka Qarammada Midoobay ayaa heshiiskaa ka dhashay, adduunka xaalkiisiina isbeddel weyn ayaa ku dhacay:

- Awooddii adduunka ka talinaysay ayaa Yurub gacanteedii ka baxday dagaalkii iyaga dhex maray awgiis. Laba quwadood oo laba mabda’ kala haysta ayaa soo baxay oo Yurubta lafteedii kala jiitay markay liciiftay. Waa Mareekanka iyo Ruushka. Wax lagu magacaabo ‘dagaalka qabow’ ayaa iyagana dhex maray.

-Dalalkii la gumeysanayay oo laftoodu gadooday, haba iska itaal yaraadeene, dagaalladii socdayna ‘xaabo’ lagu adeegsanayo ahaa, ayaa madaxbannaani helay oo ‘dawlad-qarameedyo’ loo aqoonsaday raacaya qaabkii iyo hab maamulkii uu gumeysigu u dhisay ee ku dhaafay.

Jamhuuriyaddii Soomaaliyeed Ayaa Sidaas Ku Timid

Maxaa kafaala qaadayay jiritaankeeda iyo madaxbannaanideeda? Waa saddex arrimood:

Isku duubnida shacbiga Soomaaliyeed oo si kasta ha u dibudhacsanaadee (qabaailkii iyo dhaqankoodii ha sii jiree) mar walba u hanqal taagayay inay ilaashadaan qarannimadooda weli yagleelka ah ee aan gaamurin.. mashaakilkii ku yimaaddana la iska la kacaa kufo iyagoo mar walba tixgelinta ugu weyn siinaya in dalka uu ka jiro dastuur lagu dhaqo iyo talis rayid ah oo dadka ka yimaadda, kuna yimaadda doorashooyin (ha iska goldaloola badnaadeene)

Loollankii ka dhexeeyay labada quwadood ee addunka ka jiray- NATO (Galbeedka) iyo WARSAW (Bariga).

Dalka Soomaalida oo ka tirsanaa kuna tiirsanaa dawladaha dhexdhexaadka ah ee Afrika, Aasiya iyo Laatin Ameerika oo xilligaas magac iyo tixgelinba lahaa, una janjeedhay taageeridda gobanimadoonka adduunka saddexaad.

Lixdankii illaa Sagaashankii, saddon sano gudahood, saddexdaa arrimood ee aan soo sheegay ayaa gilgil xad-dhaaf ahi ku dhacay oo mid walba gudaha ka cuskaday. Kaas oo ku yimid isbeddelka dhaqaalaha, cilmiga, teknoolojiyada warfaafinta iyo isgaadhsiinta. Loollankii siyaasadeed iyo kii bulsheed ee addunka ka jiray ee Bari iyo Galbeed loo kala safnaa isbeddelkaas ayaa saamiga ugu weyn ku lahaa, natiijaddii ka dhalatayna waa tan kala sarraynta maanta jirta abuurtay:

b. Midowgii Soofiyeeti ayaa burburay.. gaashaan buurtii Warsaw ayaa kala furfurantay oo kala tagtay qaarkoodna NATO ku biireen.

t. Ururkii dalalka dhexdhexaadka ahaa ee adduunka saddexaad – Afrika, Aasiya iyo Laatin Ameerika ayaa meesha ka baxay markii wixii la dhexdhexaadinayay ay kala tageen.

j. Gaashaanbuurtii NATO oo markan ismahadisay ayaa isu xil saartay ilaalinta nabadda iyo ammaanka adduunka si ay qiil ugu hesho jiritaankeeda mar haddii lidkeedii Warsaw meesha ka baxay.. Mareekanka ayaa mayalka u qabtay.

NABADDA IYO AMMAANKA ADDUUNKA waa ayo cidda khatarta ku haysa ee looga baqayaa mar haddii shuuciyaddii wax lagu khuukhin jiray, xarunteedii lagu furfuray?

Falsafad hor leh ayaa la unkay: Cadowgu waa argagixisada adduunka oo mar walba adeegsanaysa xaddaaradda Islaamka. Xaddaaraddaas gabowday ayaa lagu sheegay inay dawladnimada casriga ah iyo hab-maamulka dimuqraadiyaddda ee nolosha reer galbeedka halbawlaha u ah ka soo hor jeeddo kuna dhaarsan tahay inay burburiso.

Micnihii iyo xuquuqdii qarannimadu lahayd iyo awooddii adduunka ku ilaalin jirtay ayaa meesha ka baxay. Iska daa kuwa burbura (sida Soomaalida) ee kuwo taagan oo dhisan oo dhigaysan ayaa duhur cad la weerarayaa:

- CIRAAQ .. hubka halista ah inay qabto oo adduunka galbeed iyo ilbaxnimadiisa dhaawac la maaggan tahay ayaa loogu marmarsooday markii la gelayay 2003, iyadoo hey’addii caalamiga ahayd ee baadhista hubkaas loo saaray ay beenaysay eedayntaas lagu andacoonayay. Been-abuurkaas waxaa si badheedh ah qayb libaax ka qaatay dalka Britaaniya ee bisha soo socota la leeyahay badbaadinta qarannimada Soomaaliyeed ayaa shir caalami ah oo 40 dal ka soo qaybgalayso caasimaddeeda lagu qabanayaa.

-LIIBIYA ayaa, sida la ogyahay, ka mid ah adduunka saddexaad inta lagu tiriyo wax 40kii sano ee u dambeeyay dhismaha dalkeedu gaadhay mid la barbar dhigi karaa aanu jirin. Inta Ururka Carbeed ee ‘barakaysan’ iyo Qaramada Midoobay loo adeegsaday ayaa iyadoo la sheeganayo in loo gurmanayo masaakiinta Qadaafi iyo taliskiisu ku xasuuqayaan Benghazi laga dhiciyo ayaa loo mindiya gurtay oo isagii Qadaafi ahaana halkii la ogaa lagu silciyay (si aan diin iyo dadnimo toonna waafaqsanayn); imminkana dalkaa gudihiisii ay kooxihii laysku hubeeyay isku cunayaan oo isku cayrsanayaan. CEELASHII BATROOLKANA ay dul fadhiyaan oo daldalanayaan kuwii markii horeba qorshahaas dejiyay ee “Gurmadka Bani'aadminimo Ku Yimid!!”

-SUURIYA.. Saawirtii maanta Suuriya ayay dul saaran tahay. Sidii Liibiya oo kale ayaa Ururka Carabta laga soo ansaxiyay in madaxweynaha Bashaar Al-Asad iska wareejo xilka oo ku-xigeenkiisa hoggaanka dalka u dhiibo, ciidamo nabad-ilaalin ahna (sida kuwa geyigeenna jooga) ama (sida kuwii Liibiya galay) loo diro Suuriya. Qorshahaas markan waxaa is hortaagay Ruushka, iyo Shiinaha. Kuwaas oo sheegaya in shalayto markii Liibiya la gelayay been taasoo kale ah lagu siray iyo tan labaad oo ah in Ruushku aanu oggolayn in Galbeedku keligiis adduunka ka amar ku taagleeyo.

-SUUDAAN oo shalay ka soo jeesatay mushkilladii Darfur ee dalka Suudaan midnimadiisii, qarannimadiisii iyo horumarkiisii gilgishay.. ayaa laga barbar furay ‘Jamhuuriyadda Koonfur Suudaan’. Waa xilli taliskii Suudaan ka jiray jabhaddii koonfur ka dagallami jirtay (oo weligeed xukunka oo ay saamigooda ku yeeshaan mooyee aan marna goosasho barnaamijka ugu jirin) wada hadal iyo heshiis la galay maamulkii dalkana si roon uga qayb geliyay. .MISNA LAGU MA DHAAFIN! Waayo? Sida Liibiya oo kale, maanta wixii dagaalkii qaboobaa ka dambeeyay lama oggolaan karo in dal ballaciisu gaadhayo malyuun kiiloomitiryo wareegsan iyo wax ka badan oo shicbi iyo dawlad yari ka taliso khayraadka intaas le’eg oo siday rabto ka yeeesho. . (bal ka warran dalka cidlada laga helo isaga!)

SHALAYTO (2001) : Arrinta argagixisada adduunka iyo ka hortaggeeda ayaa 29 dawladood Maraykanka iyo Britayn ku hor kaceen oo duulimaad lagu qaaday dalka Afghanistan iyagoo Taalibaan lagu magacaabay ‘sheydaanka’ lala dagaallamayo.

MAANTANA (2012): 40 dawlo ayaa la isugu wacay si hororkii Afghanistan mid ka daran oo ka dillaacay dhulka Soomaaliyeed looga hor tago oo shirweyne magaalada London loogu qabanayaa.

Maxay Soomaalidu u noqotay dalka maanta loo shirayo ee laga shirayo?

Marxalad u baahan in la isku yara taago, oo si miyirqab ah looga bogto.. sababtoo ah waxaan maanta taagani si toos ah ayay marxaladdaas ula xiriiraan. Haddaan si sax ah loo fahmin, dhibta maanta jirtana la garan kari maayo, ee meelo kale oo khalad ah ayaa loo aanaynayaa. Taasina runtii waa ta si weyn u keentay marinhabowga lagu jiro maantadan aynu joogno, ama ha ugu wacnaato jahli iyo aqoondarro ama ha ka timaaddo is-diidsiin iyo danaysi bareer ah. WAA KACAANKII 1969.. ee xoogga dalka Somaliyeed taladii kula wareegeen iyadoo uu keenay saluuggii la saluugay taliskii rayidka ahaa musqmaasuqiisii iyo doorashooyin-boobkii lagu arkay sannadihii u dmabeeyay, oo shicbigu ka calool go’ay.

Dalalka saboolka ah, soo koraya, ee dhowaan gobanimadooda hantay dagaalkii 2aad ee adduunka ka dib, dawladnimadooda waxay ku dhiseen heyadihii ay maamulkii gumeysiga ka dhaxleen.. ee ma aha mid ku yimid mid ku yimid isbeddel dhaqan dhaqaaleed oo taxane taariikheed oo dheer ka soo jeeday (domestically, through a long historical process of socio-economic transformation). Heyadahaasi waa kuwo liciif ah, hase yeeshee aan dawladnimadu ka maarmayn- balse ku dhisan tahay. Heyadahaas waxaa udub dhexaad u ah heyadda difaaca, amniga iyo ammaanka ee ciidammada qalabka sida.. ee militarigu hormood u yahay. Heyadahaasi dhammaantood waxay ku shaqeeyaan xeerar dawladeed oo xilalkooda iyo dhismahooda qeexaya. Xeerarkaasi waxay hoos yimaaddan oo ka shidaal qaataan oo waafaqsan yihiin dastuurka dawladda ay ka tirsan yihiin. Wixii isqabad ah xeerarkaas ayaa kala haga. Xoogga dalkuna xeerkiisa ayuu leeyahay oo qeexaya xilkiisa, maamulkiisa, dhismihiisa, kala-dambayntiisa iyo horumarkiisa intaba. Xilka ugu weyni waa difaaca dalka, ilaalinta qarannimada iyo sidii ay heyadaha dawladdu ku dhisan tahay ay xilalkooda nabad iyo xassilooni ugu guttaan. Dawladda iyo hay'adaheedaasina waa inay baahiyaha xoogga dalka si roon loo daboolo si u xilkaas culus uga soo baxo.

Halkaas waxaa ka cad in dawladdu mar walba u bahan tahay xoog jiritaankeeda iyo xasilloonideeda ilaaliya. Kaasina uu yahay ciidanka qalabka sida. Arrintaasi waxay si weyn uga muuqataa dalalka qarannimadooda dawladeed dhowaan hantay ee aan weli gaamurin oo xididaysan. Sida dawladnimadeennii oo kale (1960-69). Maxaa iman kara marka labada aan soo sheegay xilka isweydaarsadaan oo xoogga dalku uu maamulka dawladda la wareego (sidii 1969 dhacday):

- hey’adaha dawladdu siday u dhan yihiin waxa ay isu rogaan kuwo u adeegaya xoogga dalka iyo hoggaanka uu samyastay.

- hey’adahaas, dadka madaxda ka noqonaya waxaa soo magacaaba hoggaankaas.

- xeerarka ay hey’adahaasi ku shaqaynayaan waxaa dejinaya hoggaankaas si waafaqsan dantiisa.

- Hey’adahaas xilkoodu wuxuu isu rogayaa amar –ka-qaadasho iyo ilaalinta xoogga dalka ee maamulkii dawladda isagu la wareegay.

(Iyadoo kooban, hey’addii u qaybsanayd ilaalinta qaranka iyo dawladnimadiisa ayaa isla wada noqotay markan dawladdii iyo ilaaliyeheediiba)

- dawladdii jirtay iyo hey’adeheedii waxay wada noqdeen kuwo loogu taliyo sida xeryaha militariga loogu talin jiray, amarka la siiyona fulin jiray.

- Dastuurkii dawlddu ku dhisnayd iyo ururradii hadhsan jiray ee afhayeenka u ahaa waa kuwa marka ugu horraysa ay xabbadda ciidanku leefto ee muuqooda la waayo.

Markay muddo sidaas ku sii socoto oo asaaskii hey'adihii dawladda ee markoodii horeba, sidaan ku soo sheegay, aan dhismo adag iyo waaya-aragnimo dawladeed ku taagnayn ee weli tababarka ku jiray, hadbana tallaabo kororsanayay iyo shicbigii ay u adeegayeen ayaa dhammaantood ciidan kor looga taliyo isu roga. Xaaladdaas oo kale (oo ka dhigan madixii oo manjo isu rogay) marka khalkhal, iyo iska horimad ku yimaaddo uu weheliyo saluugga shicbigu, xukunkaasi dhulkuu afka daraa, in kasta ha qaatee. Hadduu weliba sii qaado tallaabo xad-dhaaf ah oo waalli ku dhowaadona burburkiisa ayuu soo dedejiyaa. Dagaalkii 1977 iyo weerarkii waallaa ee ‘ kacaankii 21 Oktoobar’ ku qaaday Itoobiya waxaa ka dhashay in xooggii dalka iyo dawladnimadii Soomaaliyeed halkaas ku wada dumeen. Cidda oranaysa 1978 ilaa 1991 muddo dheer ayaa u dhexaysay oo taliskii “kacaanku’ sii jiray, jawaabteedu waxay tahay: ‘ muddadaasi waa intii ay taliska naftu iska guraysay ee marba lagu la daalayay ‘moorfiinka’, waa inta u dhexayn karta sakaraadka iyo geerida. Qaskii ka dambeeyay ee qabqablayaashu huriyeenna lafihii ‘kacaanku’ ka tegay ayuu sii feentay.

1991 meel keliya oo lagu tilmaami karo in ugu yaraan waab dawladnimo ka taagnaa ma jirin. Waxaa soo haray wuxuu noqday dal ay reero ku dul nool yihiin wax la bidhaansan karo oo isku xiraana uusan jrin. Isku-xirnaan ummadeed iska daaye, qabqablayaal dagaal ayaa goobtii dawladnimo ee bannaanaatay ku hirdamay.

SHISHEEYE.. NACAB.. IYO GUMEYSI CUSUB..

Dawladihii gumeysiga Yurub ee shisheeye ee qarnigii 19 bartamihiisii dalka Soomaaliyeed ugu yimid qabaail -midab, af, diin iyo dhaqan wadaaga- oo teel teel u deggan, dareenka Soomaalinimo ka dhexeeyo oo nabad geyigaas ku wada nool, ayaa MARKAN 1991 ugu yimid iyagoo sidii hore u kala deggan, hase yeeshee markan utun iyo colaadi dhex martay oo sidii hore aan isugu laab xaarnayn.. oo weliba xeryo qabaail, ay qabqablayaal hubaysan oo iyaga ka dhashay kala jiidanayaan lagu kala ooday.

Awoodda cusub ee maanta adduunka ka talisaa uma baahna xoog ay leedahay oo mutuxan sidii qarnigii 19aad inay isticmaasho (kaas waa mid gaboobay oo faxshar ah oo laga tegay) ee xeelado kale oo casri ah ayay awooddaasi adeegsataa oo aanay u qiil waayayn (kol ay ku tahay kan la biraynayo oo loo diro in uu mindidiisii soo qaato sida dalkeenna ka socota !)

Riwaayado indhasarcaad ah ayaa dadkii iyo himiladii ay lahaayeen la soo hor dhigay oo lagu magacaabo ‘Shirarka Dib-u-heshiisiinta iyo Dawlad-dhiska Soomaaliyeed’, iyadoo mar walba madax hor leh loo soo cimaamadayo, si aanay u damin raja-beenaadka dadka Soomaaliyeed lagu wado. Tan taliska ku meel gaarka ah ee barlamaankiisu kulan kasta oo ay yeeshaanba gacmaha isu la tagaan ee caalamka laga wada daawado ayaa u dambaysay. Haddii qarnigii 19aad dawladihii shisheeye xoog ay lahaayeen dalka ku qabsadeen, markan tab iyo xeelad ka duwan ayaa loo adeegsaday oo ah in dadka Soomaaliyeed dhexdiisa laga shaqaysto oo reero iyo qabaa'il loo kala sooco.. taas oo ay u weheliso ciidammo Afrikaan ah iyo kuwo sida dalalka aynu deriska nahay loo soo ijaarto. Si dadka Soomaaliyeed, siduu u wada dhan yahay, aanu ilduufkaa loogu tala galay iyo marin-habaabintaas ka soo noqon ayaa loogu sameeyay oo loogu sawiray in dalka ay ku loollamayaan laba quwadood oo raba inay ku kala guulaystaan hanashada shicbiga Soomaaliyeed iyadoo mid waliba ku andacoonayso inay ummaddaas ayaandarradu ku habsatay ay badbaadadeeda u heellan tahay.

DHINAC Waa Mareekanka iyo xulufadiisa.

DHINACA kalena waa ururrada calanka Islaamka wata..

Labadaas dhinac isku meel ayaa laga wada falkaa.. looga taliyaa.. isku hawl qura ayay u adeegayaan ee muraadka laga rabaa waa in dadka Soomaaliyeed, qaarna u arkaan Maraykanka iyo intuu cagaha ku wato inay yihiin kuwa u hiilinaya... inta kalena kuwa “calanka Islaamka’ wata ee maalin walba ‘aayad’ iyo ‘suurad’ Quraanka kariimka ah meel qaawan oo faxshar ah lagu biraynayo (Maraykankuna adduunka tuso hororka uu ka hor jeedaa siduu yahay) u arkaan hiilka Eebbaheen cirka uga soo diray ee qaybta kale ee gaalada ah ka xoraynaysa. Waa halkii lala doonayay. Qosol, qayayaab iyo qadiid isku jira waxaad ka qaadaysaa kuwa ‘indheer-garatada’ sheeganaya ee maanta muranku ka dhex taagan yahay ee u kala safan:

- Yaa Mareekanka la jira?

- Yaa Shabaabka raacsan?

- Yaa Soomaali weyn ah?

- Yaa gooni-u-goosato ah?

- Yaa federaal ah?

- Yaa midnimo buuxda ah?

- Yaa dawlad goboleed ah?

- Yaa ‘barwaaqo land’ ah?

- Yaa ‘baraaro state ah’?

- Iyo qaar kaloo badan

Magaalada caanka ah ee Istanbul ee dalka Turkiga oo beri la odhan jiray Byzantium oo boqortooyo reer Yurub ah caasimad u ahayd ayaa lagu soo duulay oo magaalada duleedkeeda inta loo fahdiistay wax cunto iyo biyo ah loo diiday inay galaan si ay ka dib isu dhiibto. Wadaadaddii ka talinaayay magaalada ayaa laga sheegay in iyadoo ay xaaladdaas ku jirto magaaladu ay iyagu hawl taas ka culus ku fooganaayeen oo Kaniisadda dhexdeedii muddadaas kaga murmayeen ‘MALAAIGTU Ma LAB BAA MISE WAA DHEDIG?!’ Murankaas ayaa tariikhda ku caan baxay ‘murankii Byzantium’ oo halqabsi looga dhigaa wixii muran ama dood ah ee aan micne lahayn, sida su’aalaha sare ee aqoonyahan badan oo hawl weyn looga fadhiyay ay ku habsaameen. (Alla ha inoo sahlo.)

Sidaan qoraalkan kooban ku bilaabay danta aan ka leeyahay waa xoojin aan ku taageersan ahay Maxmed Daahir Afrax iyo Cabdishakuur Sheekh Cali Jowhar qayla-dhaankoodii oo aan qabo inaan dadka qaarkood u sii iftiimiyay waxa ummadda Soomaaliyeed lala maaggan yahay iyo sida xaalkeedu u yahay ‘ismoog aqalkii bay aslaysaa!’ Intii digniintaa culus isku si u wada aragtaa, ha sii toostoosiso, ha naaxnaaxiso, ha faafiso oo ha fidiso, ka bacdina ha loo gudbo in la isla qeexo ‘ wixii laga yeeli lahaa’.

Ma quus baa la joogaa oo talo way dhacantay? Mise weli waxbaa la qaban karaa hawl iyo waqti kasta ha qaadatee, iyadoo lagu xisaabtamayo xaqiiqada maanta dalkii Soomaaliyeed ka jirta iyo sida uu u kala yaal?

Daba-dhah

Oday iyo wiilkiisa yar oo wada socda, carriguna aanu xasillayn, ayaa wiilkii dareemay haqdhaqaaq aan ka dheerayn oo gaadmo la maaggan. Intuu odaygii ku jeestay ayuu ku yiri:“ waar, Aabbe la inoo ballan!”

Odaygii oo warka wiilkiisa ka soo yeeray yasaya inu micnedaran yahay ayaa ugu jawaabay:

“Beeryare dishow, beenta iska daa!”

Waqti yar ka dib, halkii ayaa odaygii iyo wiilkiisiiba lagu dilay.Imminka anigu warkii wiilkaan wadaa:“ ee Aabbe la inoo ballan!!”

Siciid Jaamac Xuseen

E-mail: sjx2005@hotmail.co.uk

©Weedhsan Corporation