Allow yaa dhala oo dheefsada!

Dadka wuu ka dhex muuqda oo la dhaqan maaha, waad la yaabaysaa nuurka ka baxaya wajigiisa markuu kaa soo hor baxo. Waad la dhacaysaa habka uu dadka ula macaamilayo markaad aragto, tacajab baa ku dilaya  haddaad daqiiqado kooban la sheekaysato, ma wayna da’diisu oo marka hore uba hunguroon maysid inaad waqti ku lumiso agtiisa, hayeeshee haddaad hoos ugu dhaadhacdo intaad isla waynida ka baxdo  inta  uu hadalka kuu wado hareeraha eegi maysid, hoosna fiirin maysid, hawadana eeg eegi maysid… Hor alle waad hoganaysaa oo hawadaad ku jirto mid aan ahayn buu kuu hindisayaa, himilooyin aan kugu jirin baa kuu hiraya,  markaad hor taagantahay, ha ahaadeen kuwo adduunyo iyo kuwo aakhiraba’e.

Waa 13 jir ka miisaan culus 30 jirro badan oo aad taqaano. Markuu yaraa aqoon diineed iyo adaab wacan baa lagu koriyay oo uu ku barbaaray,  aqal wacan, hooyo suuban iyo aabbo fiican buu ku soo ag koray. Hadal turxaan iyo tuuro tuuro leh  waligii cid kumuu odhan oo hadduumeel lagu hadal hayo marayana dhaguhuu faraha ka gashadaa oo dhakhso u dhaafaa. U dhibirsanaanta masaakiinta wuu ku dhaataa oo wuxuu ku dhaamo lama dhaafo.  Haa waa wiil yar oo dheef adduun oo badan ma haysto laakiin wixii nusasaace loo siiyuu waxna cunaa inta kalena la baxaa,  waayo wuu yaqaanaa oo waa la baray faa’iidada iyo falaaxa ku jira in qofku aakhiradiisa u hor marsodo.

  Masaajidka kama dhamaado intuu wax dhigashada ka soo maqan yahay, masaajidka laftiisu waa mid ka mida meelaha uu wax ka dhigto, Quraanka iyo qawlka Eebbe markuu 12 jir ahaa buu dhameeyay oo dhakada ka qabtay.!!!!…

Dhayal kuma dhaafto salaadu.. hadduu si uun uga habsaamo salaada jamaca maalintaa wuu dhakafaaraa waanu ku dhaliilaa naftiisa, Quraanka uun dhakada kama qaybine, tafsiirkiisa & Taariikhdii Rasuulkana wuu dhigtaa ….

Isla weyni iyo is qancin qalbigiisa inta u yarna laga soo heli maayo , oo wuxuu aaminay oo la baray inay adduunyaduba maalmo kooban tahay oo marba ciddii gacanta saraysa ay leeday. Waxa la baray in bini aadam abtirsiinta uu doono ha sheegtee uu ku wada aroorayo uun NABI AADAM (AABBEHEEN CALAYHI SALAM), iskibrin kuma jirto dabcan waxa uu dadka ku qadariyaana maaha, ilmaadeernimo iyo abtirisiin, maaha aduun iyo Aqalo badni, se waxa agtiisa ka wayn sharaf iyo karaamana inuu leeyahay uu u rkaa kolba cidda uu cilmi diineed iyo aduunyaba ku tuhmo.

Dhallinta uu la dugsiga yahay wuu ka dhex muuqdaa oo ixtiraamka iyo karaamaynta ay dusha ka huwiyeen, waa haldoorka hogaamiya ardayda filkiisa ah, waa hadalkar hor istaaga daabuurka oo ardayda u hibeeya waanooyin iyo wacyigaliba, waalidkiisa iyo barayaashiisu way ka war hayaan oo wuu uga suntanyahay awlaada kale,…..

Akhriste waan arkaa inaad la dhaygagasan tahay way ii muuqataa waxa maskaxdaada ka dhex guuxaya ood kor u odhan kari laadahay ‘oo ma aayadbaa yarku?’ Aayad maaha oo awlaada kaluu la midyahay, wax uu dheer yahayna ma jiraan oon ka ahayn in hooyo fiican iyo aabbo suubani barbaariyeen, intuu yaraa la baray waxa wanaagsan loogana digay waxa xun, in lagucanqariyay caqiidada suuban iyo ku camal falkeeda. Haa oo waqtibaa la siiyay in la toos toosiyo, waana laga hortagay inuu  tuuro tuuro iyo turxaanba yeesho, waa laga talaalay dhamaan tilmaamihii aan tolmoonayn, waana lagu toosiyay dhamaan tubihii wacnaa.

Aabbe iyo Hooyo in la noqdaa waa mid fudud oo ay samayn karaan laba qof oo kasta oo ku heshiiyaa, kuma xidhna midabka ay yihiin, kuma xidhna muruqa ay leeyihiin, kuma xidhna maamuuska ama magac la’aanta ay bulshada ku dhex lihiin labada qof ee qoyska abuurayaa, laakiin maaha mid fudud in la soo saaro ilmo noocan oo kale ah.. Haa ma fududa oo hawl badan bay doonaysaa…Haddii ciddii laga sugayey inay soo saartaaba aanay ahayn cid awood u leh, ama aqoon u leh sida loo soo saaro ubad baarri ah, sida loo soo saaro ubad wax ku tara, sida loo soo saaro ubad iyagu wax taransada, sida loo soo saaro ubada ummada wax u tara sida loo soo saaro ubad ubadka kale wax u tara..miyay soo saari karaan ? May oo kaliya ha odhan ee noqo mid soo saari kara/karta awlaad caynkana, oo anfac adduunyo iyo midaakhiraba kuu yeesha, noqo qof qaybtiisa ka qaata qor qorida iyo qurxinta, qiimaha iyo qadirinta soo saarida ..kusoo darida bulshada qof qof ah.

Ilaahay xaqqa ha inna waafajiyo

 Allow Yaa dhala oo dheefsada !!

Qalinkii: Saddam Xuseen Carab

saddamcarab@gmail.com – F/B: Saddam Carab

Hargeisa- Somaliland

February 2012