Wuu sii
jeedaa, sii Jeedkiisa ayaana muujinaya daranyada oogadiisa ka muuqata. Qofka
dhabarkiisa soo socda wuxuu ula muuqdaa in uu kambadhuudho, balse mana kuududo,
mana kadaloobo. Wuxuu si nasasho leh lugaha ugu fidsaday dhulka. Shaadhkiisu
dhabarka ayuu jeexan yahay, waxase ka hooseeya maro kale oo malahayga aan u
qaatay Garan, sababtoo ah Jidhkiisu ma muuqan.
Agabka
duugga ah ee hareerihiisa ku daadsan ayaa ku siinayay sawir ah in aanu
maskaxiyan dhammayn. Caag, sharabaaddo, maro hun ah iyo kabo kala jaad ah, ayaa
ku xayndaabnaa. Waa Ramadantan (August, 2011), waana wakhtiyada u dhaxeeya
Salaadda Cishaha iyo Salaadda Maqrib. Waa suuqa Hargeisa badhtamihiisa, dhawr
tallaabo marka laga socdo Masjidka Cali Mataan, meel u dhaxaysa Masaajidka iyo
Sarta dheer ee Dahabshiil. Waxa hareera maraya dad, gaadiid iyo Xoolo intaba,
kuwaas oo cagtoodu u maraysay masaafo mararka qaarkood aan u qabay in ay ku
istaageen. Meel halkeer ah oo garabkiisa midig ku beegan, waxa ka qaylinaya Rag
ku dhawaaqaya Qiimaha Jaadka, waxay hadba xidhmo Jaad ah kala soo boodayaan oo
ay ka soo dhufanayaan Jawaan duuban (Baag) oo Miis halkana yaalla, waxaanay
kula soo ordayaan hadba qofkay u muuq iyo il-gartaan in uu Jaad doonayo. Iyaga
laf ahaantoodu, hadba way ka dul lalayaan oo waxaad mooddaa inaanay arkaynin
ninkan dhan ee meesha fadhiya. Isagase kama qasna oo saxmaddaasi waxay
qiyaastayda uga dhignayd waxaan jirin. Madaxiisu in badan ma muuqato, balse
waxaan arkayay qadaadkiisa, maxaa yeelay inta kale way foorartay, mase arkayn
wuxuu ku fooraray.
Gartay in
uu wax ku dhaygagsan yahay, labadiisa gacmood iyo Madaxiisuba ku maqan yihiin.
mase arkin waxa uu yahay, waayo meel dhabarkiisa qumaati kaga beegan ayaan kaga
aaddanaa. Aniga oo u degdeggaya in aan arko waxa ninkani ku gama’san yahay,
ayaan tallaabada si boobsiis ah u qaaday, dhawr qof isku dhacnay, balse iima
muuqdaan waxaan ahayn in aan arko waxa uu ninkani ku foogan yahay, waanse
dareemayay dhawr qof oo inta aanu Garabka isku dhufanay, qaarkood eegmo dagaal
huwan iga daba keenayaan, qaarnoodna haaraan hadal ku ladhan yahay iga soo daba
tuurayaan. Waxase aniga ii muuqday meel indhahaygu ku maqnaayeen oo ahayd in
aan ka war keeno.
Socodkaygu
wuxuu kaga beegmay dhinaca bidix, markasta oo aan u sii dhawaado oo aan
is-idhaahdo hadda ayaad arkaysaa wuxuu gacmaha ku haystaba, waxa uu
isu-barbarinayay dhinaca Midig. Waxaan u qaatay in uu ila socdo oo uu aniga iga
malmalayo waxa uu haysto, hase ahaatee, ma ahayn. Wuxuu isu janjeedhinayay
dhinaca midig, sababtoo ah, waxa uu rabay in uu Iftiinka dhinaca midig ka xiga
ee Jaadka lagu iibinayo ku arko shayga uu hayo ee aan anigu u jeellanaa in aan
la arko. Cabbaar yar ayaan ku mashquulay in aan ka bogto Wejigiisii iyo
soo-jeedkiisii, sababtoo ah, sii-jeedkiisa mooyaane ma arag wajahaddiisa. Hase
yeeshee, taasi ma hakin tiigsigaygii. Lugihiisu waxay ku fidsan yihiin Dhulka
oo dirri ah, Kab bilaa sharabaad ah oo Buudh ah ayuu lug gashan yahay, lugta
kalena Sharabaad bilaa kab ah ayuu xidhan yahay. Si qumaati ah, ayaan
isu-hortaagay, aniga oo masaafo ka yar durkay, si aanu u dareemin
dhugashadayda. WAXAAN ARKAY WUXUU KU FOORARAY!!! Wuxuu si dangiigsi ah labada
gacmood ugu hayaa oo aad mooddaa in uu ka ilaalinayo in uu dhaco Kitaab Quraan
ah oo xaqiiqdii u muuqday in uu yar daranyaysan yahay isaga laftiisu. Wuxuu
labada sacab ugu xejinayay sidii uu Jaldigu ka dhacayo Kitaabka, wuxuuse si
dhugasho leh indhaha ugu hayay sadarada iyo xuruufta Quraanka ee ku daabacan
Bogga Kitaabka ee markaa kala furnaa. Afkiisa ayaan eegay, wuu dhaqdhaqaaqayaa,
waxaanu si taxaddir leh u hakinayaa akhriska. Ma garan karo suuradda uu
akhrinayay, sababtoo ah, toos uma arki karayn, balse bogga furan ee Kitaabku
wuxuu ahaa badhtamaha Kitaabka. Qiyaastayda Jisaska 14 ilaa 15 ee Quraanka.
Waan ku dhawaaday, si aan u hubiyo akhriskiisa, mise waxa dhegahayga soo
gaadhay aayado ka mid ah Quraanka uu akhrinayay.
Inkasta
oo aan wakhti yar taagnaa oo aan ka bogtay, haddana waxaan isweydiiyay ninka
haddii dadka la waydiiyo ula muuqanayay in uu Xanuusanayo ama waalan yahayba –
sida aynu nidhaahno, ee haddana Qawlkii iyo Kitaabkii Alle (SWT) xiskiisu
siiyay in uu akhriyo iyo sida dadka qaar loo qabo in uu Xiskoodu dhan yahay ama
ay miyir-qabaan ay uga tageen Cibaado iyo Quraan-akhris labadaba.
Barkhad M. Kaariye
Hargeisa, Somaliland.
No comments:
Post a Comment